Жаңа Конституция жобасы: кім Қазақстан президенті болып сайлана алады

Жаңа Конституция жобасында Қазақстан президентін сайлау ережелерін бекіту ұсынылады, деп хабарлайды Конституциялық сотқа сілтеме жасаған KAZ.NUR.KZ.

Конституцияның жаңа редакциясының мемлекет басшысына арналған үшінші бөлімінде Қазақстан президентін Қазақстан Республикасының кәмелетке толған азаматтары конституциялық заңға сәйкес жалпыға бірдей, тең және төте сайлау құқығы негізінде жасырын дауыс беру арқылы жеті жыл мерзімге сайлай алатыны айтылған.

"Конституцияға сәйкес бір адам бір реттен артық Қазақстан Республикасының президенті болып сайлана алмайды", - делінген құжатта.

Қазақстан Республикасының президенті болып тумысынан Қазақстан Республикасының азаматы болып табылатын, қырық жасқа толған, мемлекеттік тілді жетік меңгерген, Қазақстанда соңғы 15 жыл бойы тұратын, жоғары білімі бар және мемлекеттік қызметте немесе сайланбалы мемлекеттік лауазымда кемінде бес жыл жұмыс істеген Қазақстан Республикасының азаматы сайлана алады.

"Қазақстан Республикасы президентінің кезекті сайлауы оның өкілеттік мерзімі аяқталғанға дейінгі екі айдан кешіктірілмей өткізіледі және Қазақстан Республикасы Құрылтайының жаңа құрамын сайлау мерзімімен тұспа-тұс келмеуге тиіс.

Дауыс беруге қатысқан сайлаушылардың 50 пайызынан астам дауысын алған кандидат сайланды деп саналады.

Кандидаттардың ешқайсысы 50 пайыздан астам дауыс санын ала алмаса, ең көп дауыс санын алған екі кандидат қайта дауысқа салынады. Дауыс беруге қатысқан сайлаушылардың ең көп дауыс санын алған кандидат сайланды деп саналады", - делінген жобада.

Мәтіннен қате тапсаңыз, бізге жазыңыз