Қазақстанда жаңа Конституция жобасын қабылдау бойынша референдум өтіп жатыр

Бүгін, 15 наурызда Қазақстанда жаңа Конституция жобасын қабылдау бойынша референдум өтіп жатыр. Дауыс беру учаскелері ашылды, деп хабарлайды KAZ.NUR.KZ.

Қандай мәселелер дауысқа салынады

Бұған дейін Орталық референдум комиссиясы хабарлағандай, бюллетеньде:

"Жобасы бұқаралық ақпарат құралдарында 2026 жылғы 12 ақпанда жарияланған Қазақстан Республикасының жаңа Конституциясын қабылдайсыз ба?" деген бір ғана сұрақ болады.

Бұл сұраққа "иә" немесе "жоқ" деп қана жауап беруге болады.

Жаңа Конституция жобасының толық мәтінін мына жерден оқи аласыз.

Қалай дауыс беру керек

Дауыс беру учаскелері таңғы сағат 7:00-де ашылды, кешкі сағат 20:00-ге дейін тиісті учаскеде дауыс беруге болады.

Дауыс беру учаскесі азаматтардың тұрғылықты жері бойынша анықталады. Яғни, жергілікті атқарушы органдар белгілі бір тұрғылықты жері бойынша тіркелген азаматтардың тізімін жасайды.

Уақытша тіркелген азаматтар берілген өтініш негізінде тізімге енгізіледі.

Бұрын хабарланғандай, барлығы 10 413 референдум учаскесі жұмыс істейді, оның 9 779-ы азаматтарды тіркеу орнында, ал 634-і уақытша тұратын жерлерде болады.

Өз учаскеңізді қалай табуға болады

Тіркелген жеріңіздегі жергілікті атқарушы органға хабарласу арқылы өз учаскеңізді тауып, тізімге енгізілгеніңізді растай аласыз. Егер тізімде болмасаңыз, әкімдікке тиісті өтініш беруге құқығыңыз бар.

Сондай-ақ сіз өз учаскеңізді ЖСН арқылы таба аласыз. Ол үшін ЖСН-іңізді мына жерге енгізіңіз.

Тұрғылықты тіркелген жеріңізден тыс жерде қалай дауыс беруге болады

Тіркелген мекенжайдан басқа жерде дауыс беру үшін қазақстандықтар 2026 жылдың 14 наурызында сағат 18:00-ге дейін учаскелік комиссияға жазбаша өтініш беріп, жеке басын куәландыратын құжатты көрсетуі керек болатын. Содан кейін комиссия сырттай бюллетень береді.

Референдумға қатысу тәртібі қарапайым: дауыс беру күні азамат сырттай дауыс беру бюллетенін және жеке басын куәландыратын құжатты (электронды нұсқасын қоса алғанда) ұсынады.

Учаскелік комиссия азаматты референдумға қатысушылардың тізіміне енгізеді және бюллетень береді.

Сырттай бюллетень бір рет пайдаланылады және сайлаушы дауыс берген учаскеде қалады.

Сырттай бюллетень қатаң құпия құжат екенін ескеру керек. Жоғалған жағдайда оны қалпына келтіру мүмкін емес. Сонымен қатар сол елді мекендегі басқа дауыс беру учаскесінде дауыс бергісі келетін азаматтарға бюллетень берілмейді.

Қазақстандықтар үйден де дауыс бере алады. Ол үшін олар учаскелік референдум комиссиясына алдын ала өтініш беруі керек.

Өтініштер 15 наурыз күні сағат 12:00-ге дейін қабылданады. Комиссия азаматтың өтінішіне сәйкес үйде дауыс беруді ұйымдастырады.

Бюллетеньді көрсете аламын ба немесе әлеуметтік желіге жариялай аламын ба?

Дауыс беру күні және оның алдындағы күні кез келген үгіт-насихат жұмыстарына тыйым салынғанын ескеру керек. Бұл толтырылған бюллетеньді басқаларға, соның ішінде әлеуметтік желіде көрсету үгіт-насихат болып саналуы мүмкін дегенді білдіреді. Оның соңы әкімшілік жауапкершілікке әкеп соғады.

Сондықтан қазақстандықтарға бюллетеньдерін көрсетпеуге, оларды дереу жәшікке салуға кеңес беріледі.

Толтырылған бюллетеньді ешкімге көрсетпей, бүктелген күйінде бюллетень жәшігіне салған дұрыс.

Референдумда қанша қазақстандық дауыс бере алады

Орталық референдум комиссиясының мәліметінше, дауыс берушілер тізіміне тұрғылықты жері бойынша тұрақты тіркелген 12 416 759 азамат енгізілген. Олардың барлығы референдумда дауыс беру құқығына ие.

Нәтижелері қашан белгілі болады

Дауыс беру нәтижелері туралы Орталық референдум комиссиясының ресми хабарландыруы дауыс беруден кейін жеті күннен кешіктірілмей жарияланады.

Айта кету керек, егер жаңа Конституция қабылданса, ол 2026 жылдың 1 шілдесінде күшіне енеді. Қазіргі парламент те 1 шілдеге дейін жұмысын жалғастырады.

Мәтіннен қате тапсаңыз, бізге жазыңыз