Таиландтағы жер сілкінісі: Тоқаев елдің премьер-министріне көңіл айту жеделхатын жолдады

Мемлекет басшысы Таиландтың премьер-министріне көңіл айту жеделхатын жолдады, деп хабарлайды Ақордаға сілтеме жасаған KAZ.NUR.KZ.

Қасым-Жомарт Тоқаев Таиландтағы жер сілкінісі салдарынан көптеген адамның қаза табуына байланысты осы елдің премьер-министрі Пхэтхонгтхан Чинаватқа және жақындарынан айырылған отбасыларға көңіл айтты.

Президент табиғат апаты кезінде жарақаттанғандардың тез арада сауығып, отбасыларына дін аман оралуына тілектестігін білдірді.

Еске сала кетейік, бүгін Мьянманың орталық бөлігінде магнитудасы 7,7 болатын жойқын жер сілкінісі болды, осыдан кейін тағы магнитудасы 6,4 болатын дүмпу болған.

Жер сілкінісінің әсері Таиландқа да жетті - Бангкокте үрейленген жүздеген адам көшеде жүр, көптеген ғимараттан адамдар эвакуацияланды.

Жойқын жер сілкінісі салдарынан салынып жатқан көпқабатты ғимарат құлады – оның опырылған сәті видеоға түсіп қалған.

Сонымен қатар елде жер сілкінісінің қайталану қаупі туралы ескерту жасалды.