"Басқа жол жоқ": Тоқаев Біріккен Ұлттар Ұйымын реформалаудың қажеттігін мәлімдеді

"ШЫҰ плюс" саммитінде сөз сөйлеген президент Қасым-Жомарт Тоқаев Біріккен Ұлттар Ұйымын реформалаудың қажет екенін айтты. Бұл туралы Ақордаға сілтеме жасаған KAZ.NUR.KZ хабарлайды.

Мемлекет басшысының айтуынша, қазіргідей өте күрделі геосаяси жағдайда Біріккен Ұлттар Ұйымын әмбебап әрі тәуелсіз құрылым ретінде қолдау керек.

"Осы орайда БҰҰ-ны, ең алдымен, оның басты органы – Қауіпсіздік кеңесін реформалайтын уақыт келді. Бұл міндетті орындаудың қиын екенін жақсы түсінеміз. Алайда басқа жол жоқ. Егер бүгінгі басшылар бұл істі атқарудан бас тартса, мемлекеттер БҰҰ-ға сенімін біржолата жоғалтуы мүмкін", - деді президент.

Айта кетейік, бүгін өткен "ШЫҰ плюс" саммиті "Көпжақты ынтымақтастықты дамыту, өңірлік қауіпсіздік пен орнықты дамуды қамтамасыз ету" тақырыбына арналды.

Саммитте Қасым-Жомарт Тоқаев Каспий теңізі мәселесін де көтерді. Президент Каспий теңізінің хәлі мүшкіл екенін, жағдай экологиялық апатқа ұласуы мүмкін екенін айтты.

Мәтіннен қате тапсаңыз, бізге жазыңыз