"Бұрын білмеген тарихи деректер бар екен": Тоқаев Ираннан әкелінген құнды сыйлық үшін Масуд Пезешкианға алғыс айтты

Қазақстан және Иран президенттері Иран архивінен табылған қазақ тарихына қатысты көне қолжазбалар көрмесін тамашалады, деп хабарлайды Ақордаға сілтеме жасаған KAZ.NUR.KZ.

Қасым-Жомарт Тоқаев пен Масуд Пезешкианның назарына Иран Ислам Республикасы Сыртқы істер министрлігінің мұрағатынан алынған 27 қолжазбаның көшірмесі ұсынылды.

XVIII-XIX ғасырларда қазақ даласында болған қоғамдық-саяси оқиғаларға қатысты құнды деректерді қамтитын жәдігерлер алғаш рет көрсетіліп отыр.

Бұл құжаттар Қазақстан мен Иранның терең тарихи байланысын дәлелдей түседі.

Мемлекет басшысы қазақ тарихына қатысты деректерді бөліскені үшін Масуд Пезешкианға алғыс айтты.

"Бұл – өте құнды сыйлық. Біз міндетті түрде қазақ қауымына бұл көрмені көрсетеміз, бұқаралық ақпарат құралдары арқылы кеңінен дәріптейміз. Бұрын білмеген тарихи деректер бар екен. Қазақ халқына пайдалы болады деп ойлаймын", - деді Қасым-Жомарт Тоқаев.

Айта кетейік, бұған дейін Иран делегациясының Қазақстан тарихына қатысты бірқатар құнды ескі қолжазбаның көшірмесін ала келгенін жазған едік.

Мәтіннен қате тапсаңыз, бізге жазыңыз