"Елге күлкі болмай, сахнадан уақытында кету керек": Роза Рымбаева сахнадан кетуге қатысты ойын айтты

Опубликовано:

Роза Рымбаева
Роза Рымбаева. Фото: instagram.com/rozarymbaeva/

Қазақ эстрадасының жарық жұлдызы Роза Рымбаева биыл 64 жасқа толды. Жетпіске қарай аяқ басса да әнші әлі де сахнада өнер көрсетуге қауқарлы. Өнер адамының өнерден кетуі жөніндегі ой-пікірлерін ол әнші Нұрлан Албанға берген сұхбатында айтты, деп жазады KAZ.NUR.KZ тілшісі.

Роза Рымбаева өз сұхбатында өнерге деген құрметі ерекше екенін және өзінен бұрын өнерді бірінші орынға қоятынын айтты. Айтуынша, ел алдында жүрген әр адам бұл жауапкершілікті ұғынып, өнерге адалдық таныту керек. Десе де, ол әр әнші өзінің қауқарын бағамдап, өнерден кететін уақытын білуі тиіс деп есептейді.

"Мен өзімнің халімді білемін. Менің әлі он шақты жыл сахнада өнер көрсететін шамам бар. Энергиям, күш-қуатым, келбетім бар, құдайға шүкір. Әртіс уақытында сахнадан кету керек. Сол жағынан кешігіп қалсам, онда елге күлгілі болам. Грета Гарбо есімді әйгілі актриса бар ғой. Сол жасы келгенде кинодан кеткен ғой. Тіпті елге көрінбеген. Себебі ол басқа деңгейі, басқа түрін көрсеткісі келмеген. Сол жарық жұлдыз кезіндегі келбетім халықтың есінде қалсын деп. Бізде ондай емес, бізде жай ғана уақытында сахнадан кету керек. Уақытында, елге күлкі болмай, дірілдеп-қалшылдамай, алжымай дегендей", - деді ол.

Өнер иесінің сөзінше, бұл өмірде әр әнші - жеке дара тұлға. Сондықтан бір әншіні екіншісі еш уақытта қайталай алмайды, деп есептейді әнші.

"Ешқашан да бір әншіні екінші әнші, мейлі ол сенің ұлың, қызың, сіңілім, бауырың болсын, қайталай алмайды. Бір адам еш уақытта екіншісіне ұқсамайды. Одан кейінгілер де шығып жатады, бірақ ол мүлдем басқаша болады. Қазіргі жастардың музыкасы мүлде басқа. Ритмі, стилі, мәнері басқа", - деді әнші.

Мақаланың түпнұсқасы: https://kaz.nur.kz/showbiz/1946162-elge-kulki-bolmai-saxnadan-uaqytynda-ketu-kerek-roza-rymbaeva-saxnadan-ketuge-qatysty-oiyn-aitty/