Шетелдік танымал жұлдыздар Түркістанды аралап, жанкүйерлерін Қазақстанға шақырды

Опубликовано:

Туркестан
Фото: tourism.kz

Түркістанда "Түркістан – Түркі әлемінің рухани астанасы" атты халықаралық туризм додасы реалити-шоуының телевизиялық нұсқасы жүзеге асты, деп хабарлайды KAZ.NUR.KZ тілшісі.

Түркістан облысы туризм басқармасының тапсырысымен қолға алынған жобаға түркітілдес 5 мемлекеттің шығармашылық өкілдері қатысты.

  • Атап айтсақ, белгілі әнші, Қырғыз Республикасының еңбек сіңірген әртісі – Мирбек Атабеков,
  • өзбекстандық танымал актриса, әнші әрі тележүргізуші – Ситора Фармонова,
  • атақты әншілер Амиль Мамедов (Әзірбайжан),
  • Серен Узун (Түркия),
  • қазақтың ұлттық өнерін насихаттап жүрген белгілі блогер Алексей Лодочников қатысты.

Облыс әкімдігінің қолдауымен Tourism kz телеарнасы ұйымдастырған реалити-шоуға қатысушылар автомобильдермен Түркістан облысының маңызды туристік орындарын аралады. Арыстан баб, Қожа Ахмет Ясауи кесенесі мен көне Сауран, Отырар қалашықтарының тарихына үңілді. Сонымен бірге "Керуен сарай" кешені мен Ақмешіт үңгірін көріп, тікұшақпен "Сайрам-Өгем" мемлекеттік ұлттық табиғи паркі мен "Ақсу-Жабағылы" мемлекеттік табиғи қорығына саяхат жасады.

Бұл реалити-шоу Қазақстан Республикасының сыртқы және ішкі туризмін дәріптеуге, шетелдіктер үшін Түркістан облысының ұлттық тарихи-мәдени құндылықтарын насихаттауға, Түркі тілдес мемлекеттер арасындағы қарым-қатынастарды, мәдени байланыстарды нығайтуға арналған. Дода қатысушылары өз жанкүйерлері мен тындармандарына Түркістан облысының тарихи орындарын таныстырды. Олар рухани астанаға туристердің көптеп келу бастамасын көтерді.

28-наурызда "Rixos" қонақ үйінің мәжіліс залында өткен баспасөз конференциясында шоуға қатысушылар өз әсерлерін бөлісіп, Түркістан өңірінің табиғаты мен туристік орындары туризмді дамытуға қолайлы екенін атап өтті. Әншілер жобаның қорытындысы ретінде "Керуен сарай" кешенінде гала-концерт берді. Танымал әндерін шырқап, түркістандықтар мен қала қонақтарының көңілін серпілтті. Ұйымдастырушылар тарапынан Серен Узунға – "Сәтті қадам", Ситора Фармоноваға – "Туризм тарланы", Амиль Мамедовке – "Зияткер жиhангез", Мирбек Атабековке – "Туризм дарабозы" және Алексей Лодочниковке "Достық жаршысы" аталымдары бойынша сыйлықтар тапсырылды.

Аталған әншілермен бірге гала-концертте Бейбіт Кушқалиев, Садраддин Болат сынды қазақстандық әншілер де өнер көрсетті.

Айта кетейік, Түркістан облысына келетін туристер саны артып келеді. Наурыз мерекесіне арналған 5 күндік демалыста Түркістанға 35 мыңнан астам адам келіп, тарихи орындары аралаған.

Мақаланың түпнұсқасы: https://kaz.nur.kz/showbiz/1963049-seteldik-tanymal-zuldyzdar-zankuierlerin-qazaqstanga-saqyrdy/