Алматыда өнер көрсеткен рэпер 50 Cent-тің желідегі жазбасы қазақстандықтарды ашуландырды

Америкалық рэпер және актер 50 Cent бір күн бұрын Алматыда өнер көрсетті. Танымал концерттен кейін шетелдік рэпердің Instagram парақшасында жазған жазбасы қазақстандықтардың көңілін қалдырды, деп жазады KAZ.NUR.KZ.

28 қарашада Алматы Аренада әлем жұлдызының концерті өтті. Шоуға келген көрермендер 2000-шы жылдардағы сүйікті әндері Candy Shop, P.I.M.P, In da club, Ayo Technology-ға билеп, қуаныштарын жасыра алмады.

Концерттен кейін әртіс әлеуметтік желідегі парақшасына жазба қалдырып, қазақстандықтардың ашуына тиген.

"Алматы, Қазақстан, керемет өтті. Егер "Борат" фильмі болмаса, менің не айтып тұрғанымды түсінбейтін едіңіздер. Мен әлемге ортақпын", - деп жазды рэпер өзі бөліскен сурет астына.

Айта кетейік, осыдан 3 жыл бұрын "Борат 2" фильмі нәсілшілдік үшін айыпталып, оған қарсы петиция жарияланған болатын. Фильмнің негізін қалаушы кино үшін неліктен Қазақстанды таңдағанын түсіндірді түсіндірді. Ал кейінірек Саша Барон Коэн бұдан былай "Борат" туралы фильм түсірмейтінін мәлім етті.

"Борат қазақ емес", "Жап-жақсы сөйлесіп едік қой. Мынауың не?", "Қазақ пен Боратты салыстырудың керегі жоқ", "Бораттың Қазақстанға еш қатысы жоқ", "Борат жайлы жазғаның артық болды", "Концертке барғандар осы қорлық сөз үшін ақы төледіңдер", - деп ашуланды желідегілер.