"Б" жоспарын қостым: Индира Еділбаева күйеуімен танысқан сәтін еске алды

Қозы Көрпеш-Баян Сұлу мерекесіне орай қазақстандық орындаушы Индира Еділбаева мен оның жолдасы желі оқырмандарына қалай танысқанын айтып берді.

Қол ұстасқан жұп алғашқы таныстығын өзгеше еске алды.

"Алғаш рет біз Мәскеудегі концерт залының кіреберісінде таныстық. Мен оның бойына назар аудардым. Ал маған бойы ұзын жігіттер ұнайтын", - деді Индира.

Ал Камалдин үшін бұл оқиға ертерек басталған екен.

"2019 жылы оның парақшасын көріп қалдым. Содан ойыма "Ах, какая женщина" әні оралды", - дейді ол.

Ғашықтар бірінші кездесу екеуінің де есінде қалғанын жасырмады.

Индира: "Сол күні оны суретке түсіргенім есімде. Негізі мен мүлде олай жасамаймын, бірақ сол күні..."

Камалдин: "Ең тебірентерлік сәт адамды енді ғана тани бастаған кез ғой. Кеудеңде көбелектер оянғаны нағыз керемет сезім".

Еділбаеваның күйеуі оған сөз салуға алдын ала дайындалған.

"Біз Балиге бардық, мен жүзікті ұзақ уақыт жасырып жүрдім. Аралда судың астынан кит сияқты шығып, жүзігімді табыстаймын деп ойладым. Бірақ ол суға түскісі келмеді, сондықтан "Б жоспарын" қосуға тура келді. Қарасам, өте әдемі мұнара тұр. Сонда көтеріліп, сөз салдым", - деді ол.