Қасиетті Рамазан айында жұлдыздар арақ-шарап қойылатын тойға бара ма?

Қасиетті Рамазан айында жұлдыздардың көбісі жұмысын тоқтатып, демалысқа шығады. Алайда ораза екеніне қарамастан өз жұмысын тоқтатпайтын әншілер де бар болып шықты. Еліміздегі өнер иелері осы айда арақ-шарап қойылатын тойларға барады ма? Оразада қайырымдылықпен айналысады ма? Бұл жайында NUR.KZ тілшісі хабарлайды.

Бұл сұраққа Мәдина Сәдуақасова мен "Меломен" тобы кідірмей жауап берсе, Ернар Айдар сауалымызды жауапсыз қалдырды.

"Ораза айында тойға шығамыз. Бірақ көп той да болмайды бұл айда. Өзіміз барған жерлерден арақ-шарап көрмедік. Тек халал тойларға баруға тырысамыз. Осы айда қайырымдылықпен айналысып, тегін ән салуға да келісеміз. Жақында Алматыдағы мүгедектер үйінде тегін ән салдық", - деді "Меломен" тобының әншісі Роллан.

Ал Мәдина Сәдуақасова өзінің қайырымдылық істерін жасырын түрде жасайтынын айтты.

"Қасиетті айда тойға шығамыз. Бірақ бұл айда асығыс болмаса, үйлену тойлары бол бермейді. Тек "50 жас", "Тұсаукесер", "Бесік той" болады. Оның өзін ауызашар ретінде өткізіп, артынша ән саламыз. Бұл айда дастарханға ішімдік қойғандарды көрмедім. Ал шақырған күнде де осы айды жоғары бағалағандықтан, тек халал тойларға барамыз. Қайырымдылық істерімді жасырын түрде жасаймын. Яғни, әлеуметтік желіге келген хаттарды саралап, ішінде мұқтаж жандардың счетына ақша аударып жіберемін. Бірақ ол ісім жайлы парақшамда айтпаймын", - деп ағынан жарылды Сәдуақасова.

Сиви Махмуди бұл айда ауыз бекіткендіктен, демалыста жүргенін, тойға шықпайтынын мәлімдеді.

Ал жаңадан танылып келе жатқан әнші Нұрман Арыстан өзінің тойларға жиі баратынын бірақ той иелерінің дастарханына мән бермейтінін ашып айтты.

"Қазір ауыз бекіту мен ауызашарға асығатын уақыт қой. Тойға шақырып жатса барамын. Ол жерде стақан соғыстырып отырғанға қарамаймыз. Өзімізге тапсырылған жұмысты атқарып, шығып кетеміз. Оның үстіне оразада тойға сирек шақырту аламыз. Бұл айда олай жасайтын адамдарды түсінбейді екенмін", - деді Нұрман.