Абай ауылында бала зорлады деп күдіктелген жасөспірімнің анасы өз шындығын айтты

Түркістан облысы Абай ауылындағы "бала зорлау" ісінде күдікке ілініп, істі болған жасөспірімнің анасы жанайқайын жеткізді деп хабарлайды өңірдегі NUR.KZ тілшісі.

Ағымдағы жылдың наурыз айында Сарыағаш ауданы, Абай ауылындағы "бала зорлау" ісі қоғамдық резонанс тудырғаны белгілі. Тергеу жұмыстары бес айға созылған істе төрт күдіктінің біреуі ғана жауапқа тартылатыны туралы ҚР Бас прокуратурасы мәлімдеді. Қалған үшеуінің жасы 14-ке толмағандықтан үшеуі де жауапкершіліктен босатылған.

Жауапқа тартылатынын күдіктінің анасы ұлының кінәсіз екеніне сенімдімін деп отыр. Тіпті тергеу кезінде қандай сараптамалардың жасалынғанын да айтып берді.

"Балалар экспертизадан өтті ғой. Ішкі киімдерін де, қандарын да алды. Тағы бір сұмдық, үйде одан кейін екі қарындасы бар. Тергеу кезінде "ағасы оларды да зорлап жүруі мүмкін" деген күдікпен екі қызымды да сараптамадан өткізуіме тура келді. Алғашында мүмкін емес деп апармаймын дегенмін. Тергеуге қажет болған соң апардым. Тап-таза боп шықты",-деді күдіктінің анасы.

"Осы шу шыққалы бері небір әңгімелер айтылды. Менің күйеуімді есірткіден қайтыс болыпты деді. Қолымда өлу себебінің анықтамасы тұр. Инсульт алып, миына қан құйылып қайтыс болған. Өзімді де есірткіге тәуелді екен деген әңгіме шықты. Мені кез келген уақытта тексерсін. Өзім күнімді әрең көріп жүрген адаммын. Дәл қазір Алматыда нәпақа тауып жүрмін. Жаңа оқу жылы келе жатыр, мектепке керек- жарақтарды алу керек. Балаларым қасымда" ,- деген келіншек сотта іс дәлелін таппайтынына үмітті екенін айтты.

Ақылы адвокаттың көмегіне жүгінуге қалтасы көтермей отырған күдіктінің анасының мемлекеттен берілген адвокат барын салады деген үміті басым.

"Адвокаттар оның ақ екенін, оны жасамағанын дәлелдеп беретін шығар. Баламның жас өмірін құртайын деп отыр. Ол жаққа барғанынша, өлгені артық. Ішім күйіп-жанып барады... Ақыры жақсы болсын деп отырмын әйтеуір. Бәрін Құдай көріп тұр ғой, ақиқат бар шығар. Бір Аллаға сеніп отырмын", - деп көзіне жас алды күдіктінің анасы.

"Селтановтардың туысы дейді. Қандай жағдайда тұрып жатқанымды көрдіңіздер. Қуықтай ғана үйдің бір бөлмесінде төрт баламмен, бір бөлмесінде әпкем екі баласымен тұрады. Сол ақпаратты жеткізгендер неге біздің жанайқайымызды айтпайды екен?", -деп ашынған келіншек ұлы жазықсыз сотталып кете ме деген қорқынышы барын да жасырмады.

Осы ретте шарасыз күйде отырған келіншек қазақстандықтар қолдау күтетінін жеткізді.