Тоқаевтың Қырғызстанға сапары: Бішкек алаңында не болып жатыр (фото)
Жарияланған күні:
Кеше Бішкектің орталық алаңында жаппай бейбіт митинг өтті – наразылық акциясы бір жарым сағатқа созылып, кейін жиналғандар тарап кетті. Қазақстан президенті Қасым-Жомарт Тоқаевтың Бішкекке сапары қарсаңында біз қаладағы жағдайды біліп қайтуға тырыстық деп хабарлайды KAZ.NUR.KZ.
Наразылық акциялары Бішкектің орталығындағы Ала-Тоо алаңында өтті. Оған шамамен 300 адам қатысты.
Бүгін аталған алаң бос тұр. Айкөл Манас ескерткішінің жанында қарауыл мен бірнеше туристі көруге болады. Мұнда тыныш болғаны соншалық, жақын маңдағы саябақтан құстардың дауыстары естіледі.
Алаң аумағы белсенді түрде тазартылуда. Айналасына қоршаулар қойылып, тәртіп сақшылары кезекшілік жүргізуде. Алаңға кедергісіз кіруге болады.
Бішкектің орталығында орналасқан Ленин ескерткіші маңында аула тазартушылар жүр. Олардың жұмысы шаш-етектен, себебі, кеше Қырғызстан астанасында қалың қар жауған болатын.
Біз кешегі митинг қатысушыларының бағдары бойынша Ақ үй ғимаратына қарай беттедік. Онда президенттің аппараты мен іс басқармасы орналасқан. Мекеме алдында да барлығы тыныш.
Осы кезде Бішкекте Тоқаев пен Ұжымдық қауіпсіздік туралы шарт ұйымына мүше мемлекеттерді қарсы алуға дайындық жүріп жатыр. Қаладағы басты көшенің бойына Қазақстан, Ресей, Беларусь және өзге елдердің тулары ілінген.
Тоқаевтың Бішкекке мемлекеттік сапары 27 қарашада басталады – мемлекет басшысы Қырғызстан президентімен кездеседі, сондай-ақ ҰҚШҰ отырысына қатысады.
Қырғыз сарапшыларының мәлімдеуінше, Бішкектегі митингілер мемлекет басшыларының сапарымен байланысты емес. Жиналғандар елдегі сыбайлас жемқорлыққа қарсы наразылық білдірген.
Мақаланың түпнұсқасы: https://kaz.nur.kz/society/1829121-tokaevty-kyrgyzstanga-sapary-biskek-alaynda-ne-bolyp-zatyr-foto/