Тағы 7 адам: Елімізде коронавирус жұқтырғандар саны сексенге жуықтады

Бүгін, 25 наурыз күні, таңғы уақытта Қазақстанда коронавирус жұқтырған тағы жеті адам туралы мәлімет тіркелді. Бұл туралы Денсаулық сақтау министрлігі растады деп хабарлайды KAZ.NUR.KZ.

Ведомство мәліметінше, қауіпті індетке тап болған жеті адамның екеуі Алматыдан, ал бесеуі Нұр-Сұлтан қаласынан анықталған.

Сонымен, бүгінгі таңда елімізде коронавирус жұқтырудың 79 дерегі тіркеліп отыр.

Олардың ішінде елордамызда 41, Алматыда 31, Қарағанды қаласында - 2, Алматы облысында - 1, Ақтөбе облысында - 1, Шымкент қаласында – 1, Жамбыл облысында - 1, Солтүстік Қазақстан облысында - 1 адам осы дертке шалдыққан.