Алматыда вирус жұқтырғандар үшін 15 күнде салынған аурухана ашылды (фото)

Алматыда коронавирус жұқтырғандарды емдеуге арналған модульді аурухана ашылды. Аумағы 5850 шаршы метрді құрайтын клиника құрылысына 15 күн ғана кеткен. Бүгін медициналық мекеме қала әкімдігінің иелігіне берілді деп хабарлайды KAZ.NUR.KZ.

Австриялық технология бойынша тұрғызылған госпиталь Алматы индустриалды аумағында орналасқан. Құрылыс үшін мұнайшылардың вахталық қалашықтарын салатын арнайы модульдер пайдаланылды. Алматыдағы госпиталь үшін модульдер Атыраудан жеткізілді.

Айта кету керек, бұл жерде медицина қызметкерлері үшін жұқтыру қаупін төмендетуге және оларды қорғауға көмектесетін ауаны желдетудің ерекше технологиясы қолданылады.

Таза ауаның күшті ағынының арқасында "лас" аймақтың ауасы стерильді аймаққа кірмейді.

Бұдан басқа, медицина қызметкерлері үшін "лас" және "таза" аймақтар арасында арнайы шлюз қарастырылған.

Госпиталь 280 науқасқа арналған, ауруханада бір, екі және үш орынды 98 палата бар.

Палаталарда ең қажетті - кереуеттер, тамшылар үшін штатив және тамақ ішетін орын ғана бар.

Олардың әрқайсысында душ кабинасы мен жеке санитарлық торап бар. 10 бір орындық бокстар жалғыз жатқызуға емес, диагноз қою үшін уақытша оқшаулауға есептелген. Олардан сыртқа тікелей шығуға болады.

Сондай-ақ, госпиталь әрқайсысы 14 адамға арналған екі реанимациямен жабдықталған, ал қажет болған жағдайда орын санын ұлғайтуға болады. Жансақтау бөлімдері өкпені жасанды желдету аппараттарымен қамтамасыз етілген.

Аурухана алматылықтарға кем дегенде 10 жыл қызмет көрсете алады.

Сонымен қатар, ол жылыту және ауа баптау жүйесімен жабдықталған, бұл жылдың кез келген уақытында емделушілер үшін қолайлы жағдай жасауға мүмкіндік береді және жер сілкініс, өрт жағдайында қауіпсіз.

Жаңа аурухананың бас дәрігері Мағаз Мұқашев айтқандай, госпиталь штаты шамамен 200 медицина қызметкерді, оның ішінде 75 дәрігерді құрайды. Олардың арасында еріктілер де, аралас қызметкерлер да бар.

Жұмыс ауысыммен құрылады, штат кестесіне сәйкес күндізгі және тәуліктік дәрігерлер болады. Барлық ақ халаттылар қонақүйде жатады, оларды автобус арқылы ауруханаға жеткізіп отырады.

Диагнозы расталған науқастар клиникаға жақын күндері әкелінеді.

Айта кетейік, күні кеше астанада да коронавирус жұқтырғандарға арналған модульді инфекциялық аурухана ашылды.

Ең маңызды әрі қызықты жаңалықтарды біздің Telegram арнамыздан оқыңыздар!