Қазақстан Азаматтық альянсының президенті қайтыс болды

2020 жылдың 3 тамызына қараған түні Қазақстан Азаматтық альянсының президенті Салтанат Рахимбекованың өмірден өткені белгілі болды. Ол жүрек-өкпе жеткіліксіздігінен көз жұмған деп жазады KAZ.NUR.KZ.

Суыт хабар жайлы Салтанат Рахимбекованың жары, "Ұлттық аграрлық ғылыми-білім беру орталығы" КеАҚ-ның басқарма төрағасы Төлеутай Рахимбеков Facebook парақшасында жазды.

Айта кетейік, Салтанат Рахимбекова Қазақстан Азаматтық альянсының президенті болып биылғы жылдың 24 маусымында сайланды.

Салтанат Рахимбекова 1965 жылы 18 ақпанда дүниеге келді, жасыл экономика және экология саласындағы белгілі қоғам қайраткері, бірқатар үкіметтік емес ұйымдардың - G-Global жасыл экономика және даму коалициясы, "EXPO&Women" халықаралық ұйымы, Қазақстан әйелдерінің аграрлық одағының негізін қалаушы және жетекшісі, экономика ғылымдарының докторы, Қазақстан президенті жанындағы Қазақстанның жасыл экономикаға өтуі жөніндегі Кеңестің мүшесі, Экология, геология және табиғи ресурстар министрлігінің Қоғамдық кеңесінің төрағасы.

"Құрмет" орденімен, Қазақстан президентінің Құрмет грамотасымен және Қазақстанның бес мерейтойлық медалімен марапатталған.

Сонымен қатар "Шығармашылық" халықаралық қоғамдық сыйлығының лауреаты. Оның ауданға жасаған ерекше қоғамдық қызметі үшін "Оңтүстік Қазақстан облысының Мақтаарал ауданының құрметті азаматы" атағы берілген.

Еске сала кетейік, бұған дейін Азаматтық альянстың вице-президенті Мұсағали Дуамбеков дүниеден өткенін хабарлаған едік.