"Құдай бізді кешірсін": Сәбиді тоңазытқышқа салған дәрігерлердің аудиосы жарияланды

Атырау перинаталды орталығындағы нәресте өліміне қатысты тың деректер жарық көрді. Сот процесінде жемқорлыққа қарсы іс-қимыл департаментінің ведомствоаралық жедел-тергеу тобын басқарған аса маңызды істер жөніндегі тергеуші Асқарбек Ермұқашевтан куә ретінде жауап алынды деп хабарлайды KAZ.NUR.KZ порталы Ақ Жайық газетіне сілтеме жасап.

Қайғылы жағдай 2019 жылдың қыркүйек айында орын алды. Сол күні Атырау перинаталдық орталығында дүниеге келген нәресте қимылсыз жатқандықтан, дәрігерлер сәбиді өлі туды деп тіркеген. Алайда нәрестені тоңазытқыш камераға апарған кезде оның аяғы қимылдай бастаған. Сыбайлас жемқорлыққа қарсы қызметтің мәліметінше, дәрігерлер құжатты түзетпеу үшін оны тоңазытқышта қалдыру туралы шешім қабылдаған.

Сотта Ермұқашев перзентхана қызметкерлері нәрестені қандай әдіспен өлтіруді таңдағанын жеткізді.  

Акушер Кулбатырованың адвокаты Талғат Мұқатанов өзінің қорғауындағы адам қандай дәлелдер негізінде айыпталғанын сұрады. Ермұқашев оған: "жасырын тергеу амалдарының нәтижесінде, куәлардың айғақтары және сот-медициналық сараптама қорытындысы негізінде айыпталды" деп жауап берді.

Кулбатырова "басқа қылмысты жасыру мақсатында адамдар тобының алдын ала сөз байласуы арқылы жасаған аса қатыгездікпен кісі өлтіргені үшін" айыпталып отыр. Ермұқашев тергеу бұның барлығын дәлелдегенін атап өтті.

"Бұл жасырын тергеу амалдарының нәтижесінде дәлелденеді. Екі адамның өзара телефон арқылы сөйлескен диалогы бар. Әңгіменің мағыналық мазмұнын анықтау үшін филологиялық сараптама жүргізілді. Сіз қорғап отырған адам – орындаушы", - деді ол.

Оның сөзінше, Жоғарғы соттың нормативтік қаулысына сәйкес, сәбиді тоңазытқышқа салып, оның тыныс алуына мүмкіндік бермеу ерекше қатыгездікке жатады.  

"Басқа қылмысты жасыру мақсатында" - қылмыстық кодекстің 317-бабы ("Медицина қызметкерінің кәсіби міндеттерін тиісінше орындамауы") бойынша қылмысты жасыру мақсатында баланы тоңазытқышқа салған.

Ертеңгі күні сараптамада анықталмауы үшін оны суға немесе тоңазытқышқа салу туралы мәселе тұрды. Аудиожазбаның мазмұнына сүйенсек, суға салса, сараптама баланың өкпесінде су болғанын көрсетеді, сондықтан олар тоңазытқышқа салуды ұйғарған. Белгілі бір уақыт ішінде тірі сәби дәрменсіз күйде болды, оған көмек көрсетілмеген. Міне, осы дәлелдер ескеріліп, негізге алынды", - деп толықтырды Ермұқашев.

Сонымен қатар жауап алу кезінде адвокат Бақберген Айтмамбетов оқиға аяқ астынан болғанын, бұған дейін олар біреуді өлтіремін деп келіспегенін алға тарта отырып:

"Психологиялық-филологиялық сараптамада "бұл нұсқау берді" деп жазылған. Сөз байласқан деген түсінік қайдан пайда болуы мүмкін, маған түсіндіріңізші" деп сұрады.

"Мен жаңа айттым, телефон арқылы сөйлескен әңгіменің стенограммасы бар, филологиялық сараптаманың қорытындысы бар, оның ішінде дәрігерлер бір-бірімен кеңесіп, осы баланың тағдырын шешкені анық.  Әңгіменің стенограммасында "Құдай бізді кешірсін" деген сөздер бар. Олар әңгіменің төркіні не туралы екенін түсінді", - деп түйіндеді Ермұқашев.

Еске салайық, өткен жылдың күзінде сыбайлас жемқорлыққа қарсы күрес департаментінің қызметкерлері Атырау облысы перинаталдық орталығының бас дәрігері Қуаныш Нысанбаевты, сондай-ақ жаңа туған нәрестені өлтірді деп айыпталған акушер-гинекологты ұстаған еді. Қызметкерлер баланы өлі туды деп рәсімдеген.

Алайда одан тіршілік нышаны байқалған кезде дәрігерлер құжаттарды қайта рәсімдегісі келмей, оны тоңазытқыш камерасына жіберген.