Қазақтың киіз үйіне тәнті болған америкалықтар заманауи ғажайып үй тұрғызуда (видео)

АҚШ елінің тұрғындары арасында қазақтың киіз үйіне күн санап сұраныс артуда деп хабарлайды KAZ.NUR.KZ порталы.

Қазақ елінің киіз үйіне ерекше тәнті болған америкалықтар оны қайта жаңғыртып, заманауи нұсқадағы киіз үйлер тұрғыза бастаған.

Көздің жауын алатын киіз үйлердің бірқатарын назарға ұсынамыз.

Бұл керемет киіз үйді АҚШ-та тұратын Зак пен Николь есімді ерлі-зайыпты 2019 жылы салып шыққан.

Олардың жобасы әлем назарына ілігіп, Living Big In A Tiny House атты YouTube каналында бейнеролик жария болады.

9 метрлік киіз үйде барлық ыңғайлықтар қарастырылған. Замануи стильде салынған киіз үйді қалай тұрғызу керектігін ерлі-зайыпты көпшілікке көрсетіп те жүр.

Олар желі парақшасында киіз үйді тұрғызу барысының видеосымен бөліскен.

Аталмыш елде қазақтың киіз үйі ерекше сұранысқа ие болғаны соншалық, АҚШ компанияларының бірі киіз үй тұрғызуды өз қызметтерінің біріне айналдырып үлгерген.

Colorado Yurt деп аталатын компания АҚШ елінде 30 жылдан астам уақыт киіз үй салумен айналысып келеді.

Небәрі бірнеше тәулікте киіз үй тұрғыза алатын компания, тіпті оған әжетхана, жарық, асүй сынды ыңғайлықтар да орнатып бере алады екен.

Компанияның ресми сайты өздері тұрғызған киіз үйлердің суреттерін жария етіпті.

Ал АҚШ-тың Мэриленд штатындағы Cherry Hill атты саябақта киіз үйді бизнеске айналдырғандар бар.

Олар сегіз адамға дейін сыятын киіз үйге жарық, кондиционер, тоңазытқыш, тегін вай-фай, монша сынды керек-жарақты орнатып, киіз үйді жалға беруде.

Еске салсақ, бұған дейін әлемдегі беделді сән журналы домбырада ойнайтын қазақ қызына тәнті болғанын жазған едік.

Одан бөлек, ат құлағында ойнайтын отандық каскадерлар Диснейдің "Мулан" фильмінде бой көрсеткенін жазған болатынбыз.