"Борат 24" дүкені атын жамылған трансұлттық есірткі тобы әшкере болды (видео)

Қазақстанда "Борат24" интернет дүкені арқылы сатуды жүзеге асырған трансұлттық есірткі тобының көзі жойылды деп хабарлайды Ұлттық қауіпсіздік комитеті.

2020 жылдың сәуір – қазан кезеңінде Қазақстан Республикасы ҰҚК шетелден ҚР-ға синтетикалық есірткі жеткізуді, сондай-ақ оларды жасауды және "Борат24" интернет-дүкені арқылы сатуды жүзеге асырған трансұлттық қылмыстық топ әрекетінің жолын кесу бойынша ауқымды операция өткізді.

"Трансұлттық есірткі құрылымына 34 қатысушы ұсталып, 8 есірткі зертханасы жойылды. Еліміздің ірі мегаполистері – Нұр-Сұлтан, Алматы мен Шымкентке контрабандалық жолмен әкелінген 40 кг психотроптық зат алынды.

Алынған есірткінің қара нарықтағы бөлшек құнының болжамды бағасы 600 млн. теңгені құрайды (80 мың мөлшерлеме). Одан басқа, "биткоиндар" сатып алу және оларды шетелге шығару бойынша қаржы операцияларын жүзеге асыру жолымен есірткі сатудан алынған ақшалай қаражатты заңдастыруды ұйымдастырған заңсыз криптоайырбастауыштар әрекетінің жолы кесілді",- делінген хабарламада.

Бұл ретте алынған ақшаны заңдастыру үшін көмекшілер жасаған 6 жылжымалы "майнинг ферма" анықталды. Есірткі құрылымының көмекшілері 2 жылда (2018 жылғы қаңтар мен 2019 жылғы желтоқсан аралығында) 2,5 млрд. теңгеден астам соманы заңдастырған.

Көрсетілген фактілер Қазақстан Республикасы Қылмыстық Кодексінің 297-бабы 4-т., 264-бабы 2-т., 286-бабы 4-т. және 218 бабы 3-т. бойынша СТБТ-ға тіркелді.

Айта кетейік, осыған дейін Алматы облысында синтетикалық есірткі сатумен айналысқан топ ұсталған еді.

Ал БҚО-да екі шетелдік азамат есірткі зертханасын ашқан деген күдікке ілінді.