Түркістанда күтпеген жерден баспаналы болғандар қуанышын жасыра алмады

Түркістанда тұл жетімдер мен мүмкіндігі шектеулі жандар және Ұлы отан соғысының ардагері күтпеген жерден баспаналы болды. Тұңғыш президент күніндегі тосынсыйды көрген олар қуаныштан көздеріне жас алды деп хабарлайды KAZ.NUR.KZ.

Мұндай бастаманы қала әкімі Рашид Аюпов көтерген. Ол ата-анасынан айырылған жетімдерге, мүмкіндігі шектеулі жандарға және Ұлы Отан Соғысының ардагеріне мереке күні пәтер кілтін табыстаған.

Нәтижесінде, бес отбасы күтпеген жерден баспаналы болып, қуаныштарын жасыра алмады.

Айта кетелік, мұндай игі шараның басы-қасында жүргендер тосынсыйлар легі тағы жалғасатынын айтқан.

Еске сала кетсек, осыған дейін әлеуметтік желі арқылы елді жылатқан төрт бүлдіршінге Ақтөбе қаласының элиталық ауданынан үш бөлмелі үйдің кілті тапсырылған болатын.

Жалдамалы пәтерде қиналып, қайтыс болған анасын сағынып жылаған балалардың жанайқайы ел президентіне дейін жеткен.

"Әлеуметтік желіге шыққан төрт баланың тағдыры республика көлемінде тарап, бәрімізге мәлім болды. Мемлекет басшысы Қасым-Жомарт Кемелұлы өз бақылауына алды. Мәселені ыждағаттап шешуді тапсырды. Бұл жерде "Харекет" қоры бар, облысымыздың жомарт жандары бірікті. Шүкір, жақсы қаржы жиналды. "Нектар" құрылыс компаниясы Батыс-2 ауданынан үш бөлмелі 93 шаршы метр болатын баспанасын ұсынды", - дейді Ақтөбе облысының әкімі Оңдасын Оразалин.

Сонымен қатар Алматыда мүмкіндігі шектеулі ұлымен қайыр тілеп жүрген жалғызбасты ананың үйлі болғанын жазған болатынбыз.