Жаңа жылда аяз ата шақыруға тыйым салынды: Бекшин жаңа қаулы шығарды

Оңтүстік астананың бас дәрігері коронавирус инфекциясының алдын алу шаралары туралы жаңа қаулыға қол қойды. Құжат Алматы қалалық санитарлық-эпидемиологиялық бақылау департаментінің ресми сайтында жарияланған деп жазады KAZ.NUR.KZ.

Қаулы осы жылдың 26-желтоқсан күні күшіне енбек.

Құжатта адам көп жиналатын жерлерде ойын-сауық, спорттық іс-шаралар, көрмелер, форумдар және отбасылық мерекелер өткізуге тыйым салу туралы айтылған.

Сонымен қатар, Бекшин жаңажылдық іс-шараларды өткізуге де тыйым салу туралы шешім қабылдады.

"25 желтоқсаннан 5 қаңтарға дейін барлық ұйым мен мекемеде жаңажылдық іс-шараларды өткізуге, сондай-ақ аниматорларды, яғни аяз Ата, ақшақар және басқа жаңажылдық кейіпкерлерді үйге шақыру бойынша агенттіктердің жұмысына тыйым салынады", - делінген құжат мәтінінде.

Алматы қаласының бас санитарының қаулысында мектепке дейінгі мекемелерде қосымша кезекші топтар мен қала мектептерінде 1-5-сынып аралығында қосымша кезекші сыныптар ашуды тоқтату туралы жазылған.

Одан бөлек, сауда нысандары, оның ішінде ойын-сауық орталықтары, сауда үйлерінің жұмысы жұмыс, демалыс және мереке күндері 23.00-ге дейін ұзартылмақ.

Сонымен қатар сағат 23.00-ге дейін қоғамдық тамақтану нысандары жұмыс істейді.

Азық-түлік және азық-түлік емес базарлардың жұмыс уақыты жұмыс күндері, демалыс және мереке күндері сағат 17.00-ге дейін шектеледі.

Қаулының толық мәтінімен сілтемеге өтіп, танысуға болады.

Еске сала кетсек, елімізде өткен тәулікте коронавирус жұқтырған тағы 754 адам тіркелген. Олардың 90-ны Алматы қаласынан.

Осылайша, қазіргі уақытта Қазақстанда COVID-19 инфекциясы анықталғандар саны 149 462-ге жетіп отыр.

Сонымен қатар, кеше Алматы қаласының коронавирус бойынша "сары" аймаққа қайта кіргенін жазған болатынбыз.