RU

Карантин талабын бұзған шымкенттіктер 3 млн теңге айыппұл арқалаған

Коронавирус
Көрнекі сурет: NUR.KZ / Петр Карандашов

Шымкентте карантин талаптарын бұзғандарға 3 млн теңге айыппұл салынды деп хабарлайды COVID-19 таралуына жол бермеу жөніндегі ВАК ресми Telegram-каналында.

ВАК-тың ресми Telegram-каналы келтірген мәліметтерге сәйкес, 2021 жылдың 1 қаңтарынан бастап бүгінгі күнге дейін Шымкентте 58 рейд барысында 1 179 нысан тексерілген.

Оның ішінде 777-сі - тағам объектісі, 345-і - коммуналдық нысан, 57-сі - балалар мен жасөспірімдерге арналған объекті болып табылады.

Карантин шарттарын бұзу жағдайлары арасында қоғамдық тамақтану орындарында жұмыс істеу режимінің, бетперде тағы режимінің, рұқсат етілген келушілер санының сақталмауы және топтық іс-шаралардың өткізілуі жиі кездесуде.

Мониторинг тобымен анықталған кемшіліктер үшін 58 жауапты тұлғаға хаттама толтырылып, барлығы 3 019 720 теңге көлемінде айыппұл салынды.

Кемшіліктер анықталған объектілер ішінде 18 қоғамдық тамақтану орны, 1 түнгі, 1 лотереялық, 3 компьютерлік және 4 бильярд клубы, 1 кинотеатр, 8 мейрамхана, 1 бургер орталығы, 9 азық-түлік дүкені, 3 лоундж-бар, 2 қораз төбелестіретін орын, 2 жанармай құю бекеті, 2 сауда нүктесі, 1 қонақ үй кешені, 1 монша, 1 балабақша бар.

Еске салсақ, бұған дейін біз елімізде бір тәулікте коронавирус жұқтырғандар саны мыңнан асып кеткенін жазған едік. Денсаулық министрлігі елдегі эпидемиоогиялық ахуалға қатысты соңғы деректерді жария еткен.

Мақаланың түпнұсқасы: https://kaz.nur.kz/society/1894224-karantin-talabyn-bzgan-symkenttikter-3-mln-tege-ajyppl-arkalagan/