Атырау облысында 700 млн теңгеден астам салық төлеуден жалтарған кәсіпорын басшысы анықталды

Атырау облысында 700 миллион теңгеден астам жасырылған салық бюджетке қайтарылды деп хабарлайды ҚазАқпарат.

Агенттіктің Атырау облысы бойынша Экономикалық тергеу департаменті нақты жұмыстар орындалмай және қызметтер көрсетілмей шот-фактураларды заңсыз жазып беру фактісін анықтады.

"Облыс кәсіпорындарының бірінің басшысы 2015-2019 жылдар кезеңінде 700 млн теңгеден астам сомаға салық төлеуден жалтарған. Аталған факт салықты тексеру материалдарымен расталған. Қазіргі таңда салық төлеуден жалтару фактісі бойынша сотқа дейінгі тергеп-тексеру жүргізілуде, мемлекетке келтірілген залал өтелді", - делінген хабарламада.

Ведомство салық төлеуден жалтару фактілері мәлім болса, Қаржылық мониторинг агенттігіне: 8 (7172) 70-84-78, Атырау облысы бойынша Экономикалық тергеу департаментіне: 8 (7122) 35-42-10 сенім телефондары бойынша хабарласуды сұрайды.

Еске сала кетсек, бұған дейін Түркістан облысының екі тұрғыны үшінші тұлғаларға үш серіктестікті тіркеп, 7 миллиард теңгеден астам салық төлеуден жалтарғаны туралы хабарлаған едік.

Жалған шот-фактура жазғаны және салық төлеуден жалтарғаны үшін олардың бірі 5,5 жылға, екіншісі 3 жылға сотталды.

Одан бөлек, Қазақстанда салық төлеуден жалтарғаны үшін азаматтарға қандай қылмыстық жауапкершілік қарастырылғаны туралы жазған едік.

Мақаланың түпнұсқасы: https://kaz.nur.kz/society/1907766-atyrau-oblysynda-700-mln-tengeden-astam-salyq-toleuden-zaltargan-kasiporyn-bassysy-anyqtaldy/