Денсаулық сақтау министрі Алексей Цой ауылда жүр

Денсаулық сақтау министрі Алексей Цой ауылдардағы екпе жұмыстарының барысымен танысты деп хабарлайды Астана телеарнасы.

Алексей Цой алдымен Алматы облысының Талдыбұлақ ауылындағы дәрігерлік амбулаторияға барған. Онда 8,5 мыңнан астам ауыл тұрғынына қызмет көрсетіледі. Мұндағы халықтың жартысынан астамы екпе алуды жоспарлап қойыпты.

Денсаулық сақтау министрі екпенің вируспен күресте маңызды екенін түсіндіріп, қауіпсіздік шараларын жіті сақтауға кеңес берді.

Амбулатория қызметкерлерінен арнайы құрылған мобильді бригада, азаматтарға қоңырау шалып, вакциналау және қауіпсіздік шараларын түсіндіріп жатыр.

"Қазір вакциналау қарқынды жүргізіліп жатыр. Кеше ғана 70 мыңға жуық адам егілді, жалпы жарты миллионнан астам азамат вакцина салдырды. Қазақстанның әрбір өңіріне вакцина келіп түсетін кестелер бар. Бұл вакциналар Еуропа, Азия елдерінде де қолданылады және тиімділігі жоғары", - деді Алексей Цой.

Осы орайда денсаулық сақтау министрі азаматтардың екпеге қол жеткізуі өте маңызды және халық үшін тегін екенін жеткізді.

Автор: Ә. Өмірзақ