"Енемнің атында": Арыстанбек Мұхамедиұлы отбасы меншігіндегі дүниелер жайлы алғаш рет ашық айтты

Опубликовано:

Арыстанбек Мұхамедиұлы
Видеодан кадр: Qasqa jol

Бұрынғы Мәдениет және спорт министрі, Ұлттық музей директоры Арыстанбек Мұхамедиұлы отбасының меншігіндегі дүниелер туралы бірінші рет ашық айтты. Ол желіде өзі туралы таралған видеоға пікір білдіріп, ел арасында тараған қауесетке нүкте қойды деп жазады Qasqa jol арнасына сілтеме жасап KAZ.NUR.KZ тілшісі.

Экс-министр астанадағы «Дипломат» қонақ үйі мен «Шапағат» базарына, тағы басқа бизнес нысандарға қатысы барын растады. Арыстанбек Мұхамедиұлы отбасы меншігінде кәсіптің көп бөлігіне былтыр, 2020 жылы қол жеткізгенін алға тартты.

"Интернетті ашсаңыз, барлығы бар. Енемнің атында, әйелімнің атында, балаларымның атына өткен жылы ашқан фирмалар бар. Салық қанша төленіп жатқаны жазылған. Оны жасыру мүмкін емес, оны жасырудың еш керегі де жоқ. Ол заңды отбасылық бизнес, егер оларды жасырсам, офшорлық бір компанияға жазар едім. Немесе шетелге алып шығар едім. Қашатын болсам. Мен қашып жатқан жоқпын ғой. Нақты жұбайымның атында тұр, нақты ұлдарымның атында тұр. Жұбайымның атында "The Family" деген кафе бар. Сонан кейін "Қазақ энциклопедиясын" өткен жылы сатып алғанымыз бар. Екі ұлымның атында жаңадан ашылған кішкентай компания "Alem education system" шетелде оқытатын білім орталығы бар. Қазір біз колледжді де алдық. Колледждің негізгі бағыты туризм, аударма ісі, қонақ үй бизнесі, аспаздық. Осы салада жүрген соң, туризм саласын біраз уақыт басқарғаным бар, бізде сервис жоқ екенін көрдім. Бұл да инновация. "Дипломат қонақ үйінің 71 пайызы енемнің атында. Негізі өткен жылы сатып алдық. Бірақ мен жастайымнан еңбекқормын. Жұмыс істедім. Біз бірінші рет астанаға көшіп келгенде 2000 жылы әйеліммен бірге "Якутские бриллианты" деген бірінші дүкенімізді ашқанбыз. Үлкен ағасы Якутияда тұратын. "Intercontinental" деген қонақ үй ашылып жатыр еді сол уақытта. Соның ішінен жалға алып, іс бастағанбыз. Енді шүкіршілік, ары қарай тағы да ұсыныстар болды. Менің әйелім тек үйде отыруы керек пе? Егер мен заң бұзсам, міндетті түрде шығар еді. Біз бәрін декларациямен көрсеттік. Сосын газ құбырын тартумен айналыстық (Тауекел-Т ЖШС). Қазір басқа дүниелер алу үшін ол компаниядан шықтық. Әр қазақтың азаматы ауқатты болсын, алға жылжысын. Керісінше бір-бірімізге көмектесуіміз керек. Ұялатын, қорқатын түгі жоқ. Мені бір жарым жылдың ішінде әбден тексерді. Қаржы полициясы, есеп комитеті бар, мемлекеттік аудит деген бар. Мен қай жерде қызмет істедім соның барлығы тексерді", - дейді Ұлттық музей директоры.

Экс-министр желіде тараған қауесетке жауап берді. Айтуынша, "ипподром мен Көктөбедегі сарайдың" өз атына еш қатысы жоқ.

Арыстанбек Мұхамедиұлы қазір тұрып жатқан үйінің көлемі 1000 шаршы метр емес, 540 шаршы метр екенін атап өтті. Ал елордадағы "Шапағат" базарының 45 пайызын үлкен қызы Айжан Мұхамедиге сыйлық ретінде сатып алып берген.

"Шапағат базарының құрылтайшылары туралы ақпарат, кімнің қанша үлесі бар екені интернетте тұр. Айжан Мұхамеди менің тұңғыш қызым, жақын араласып жүрген азаматтардан сондай бір ұсыныс болғасын бизнес жасау үшін емес, бір-бірімізге жақын жүрейік деген ниетпен алынған дүние. 45 пайызы біздікі. Оның бәрін өткен жылы алдық. Мен министр болып жүргенде емес. Қызым жақында тұрмыс құрады, сыйлық деп санасақ та болады", - деді экс-министр сұхбатта.

Мақаланың түпнұсқасы: https://kaz.nur.kz/society/1909345-enemnin-atynda-arystanbek-muxamediuly-otbasy-mensigindegi-dunieler-zaily-algas-ret-asyq-aitty/