RU

Елде коронавирус жұқтырғандарды қоғамдық орындарға барғаны үшін жазалау ұсынылды

QR код
Көрнекі фото: Matthias Balk/picture alliance via Getty Images

Денсаулық сақтау министрі министрлер кабинетінің онлайн-отырысында коронавирус жұқтырған кейбір адамдар үйде оқшаулану режимін сақтамайтынын және қоғамдық орындарға баруға тырысатынын мәлімдеді. Үкімет мұндай адамдарды жазалауды ұсынды деп хабарлайды KAZ.NUR.KZ.

Алексей Цой 26 сәуірден бастап пандемия кезінде бизнестің жұмыс істеуіне жол ашатын Ashyq жобасы басталғанын еске түсірді. Оның айтуынша, қазірге дейін жобаға барлық қызмет салаларының 6 мыңға жуық объектілері кіреді, өтінімде 1,4 миллион пайдаланушы тіркелген.

"Ashyq енгізілген сәттен бастап "қызыл" және "сары" мәртебесі бар 3256 келуші анықталды, оның ішінде ПТР-дің оң нәтижесі бар 1867 науқас және 1389 байланыста болған тұлға бар. Ashyq қосымшасы Нұр-Сұлтан мен Алматы әуежайларында қолданылады. Қосымша ПТР тестінің оң нәтижесі бар 37 науқас пен 37 байланыста болған адамды анықтады, осылайша қызметкерлер мен келушілерді қорғауға мүмкіндік берді. Бұл статистика көрсеткендей, өкінішке қарай, кейбір зердесіз азаматтар үйде оқшаулану режимін сақтамайды, халықтың жаппай жиналатын нысандарына баруға тырысады, осылайша басқа да қонақтар мен ұшақтағы жолаушыларға ауру жұқтыру қаупі бар", – деп қорытындылады денсаулық сақтау министрі.

Премьер-министрдің орынбасары Ералы Тоғжанов өз кезегінде Ashyq қосымшасы азаматтар арасында карантин режимін өрескел бұзу санының өскенін көрсеткенін алға тартты.

Осыған байланысты, ол денсаулық сақтау министрлігіне әділет министрлігі және бас прокуратурамен бірлесіп, санитарлық режимді бұзушыларға қатысты тиісті әкімшілік шараларды қолдану механизмін әзірлеуді тапсырды.

"Біз осындай шараларды қабылдауды қарастырып жатырмыз", – деді Тоғжанов.

Мақаланың түпнұсқасы: https://kaz.nur.kz/society/1913053-elde-koronavirus-zuqtyrgandardy-qogamdyq-oryndarga-bargany-usin-zazalau-usynyldy/