Шарын шатқалында сел жүріп, екі адам мерт болды, тағы бірі жоғалып кетті

Алматы облысы Шарын шатқалында қайғылы жайт болды. Бүгін ол жерде сел жүріп, екі адам көз жұмған. Олардың арасында кәмелет жасына толмаған бала да бар деп хабарлайды KAZ.NUR.KZ ТЖМ өкілі Талғат Уәлиге сілтеме жасап.

Оның сөзінше, 29 мамырда сағат 13.35-те Алматы облысының Төтенше жағдайлар департаментіне Шарын шатқалының төменгі бөлігінде балшық-сел тасқыны жүргені туралы хабарлама түскен.

"Салдарынан 6 адам зардап шегіп, 2 адам қайтыс болды. Оның ішінде біреуі кәмелет жасына толмаған. 1 адам із-түзсіз жоғалып кетті. Зардап шеккен адамдарға шұғыл медициналық көмек көрсетілді. Із-түзсіз жоғалып кеткен адамды іздестіру-құтқару жұмыстары жүргізілуде", - дейді Талғат Уәли.

ТЖМ өкілінің дерегінше, селдің жүруіне ауа райының күрт өзгеруі яғни 15 минутқа созылған бұршақ аралас жауған нөсерлі жаңбыр себеп болған.

Қазір оқиға орнында Алматы облысы төтенше жағдайлар департаментінің 31 қызметкері мен 8 техникасы және 4 жедел жәрдем көлігі, одан бөлек, жергілікті атқарушы органдардың алты қызметкері мен полиция қызметкерлері жұмыс істеп жатыр.

Мән-жай анықталуда.

Сондай-ақ, Талғат Уәли Алматы облыстық Төтенше жағдайлар департаменті шұғыл штаб құрғанын, мына 8(7282)22-02-13, 22-02-18 нөмірлер бойынша арнайы желі қосылғанын, қажетті психологиялық көмек көрсетіліп жатқанын атап өтті.

Еске сала кетейік, бұған дейін ТЖМ Түркістан облысының тауларында жоғалған екі туристің денесі табылғанын хабарлаған еді.

Мәтіннен қате тапсаңыз, бізге жазыңыз