RU

Мамандар: Күзде жұмыртқа бағасы шарықтауы мүмкін

Жұмыртқа
Көрнекі фото: piqsels.com

Елімізде жем-шөптің бағасы реттеліп, мемлекеттен субсидия бөлінбесе, күзде жұмыртқа қайта қымбаттауы мүмкін деп хабарлайды КТК арнасы.

Бүгінде жұмыртқаның уақытша арзандағаны халықты қуантқанымен, осы шаруашылықпен айналысып отырғандардың көңілін түсірген. Мәселен, 5 мың тауық ұстайтын Юлия Барсукова бұрын күніне үш мыңнан аса жұмыртқа алып сатылымға шығарған. Ал қазір оның бірі де жоқ деп отыр. Себебі, пандемия басталғалы жем-шөп қымбаттап, жұмыртқа бағасының түскені тек шығынға ұшыратқан.

"Біз бұрын мемлекеттен мүлде көмек сұраған емеспіз. Пандемия басталғалы қарызға баттық. Қазір бар-жоғы алып қалғаным 60 шақты үйрегім ғана. Қалған тауықтың бәрін сатып жібердім. Өйткені жем-шөбін табу мүмкін болмады. Былтыр жем-шөптің бір келісі 200 теңге болса, биыл 360. Енді қандай іспен айналысарымды да білмеймін", - дейді құс шаруашылығының иесі Юлия Барсукова.

Алматы облысының базарларында жұмыртқа құны әсіресе қыста қымбаттайды. Қазір саудагерлер көтерме бағамен өнімнің бір данасы 35 теңгеден келеді деп отыр.

"40 теңгеден саттық. Қазіргі бағасы 38 теңгеден. Қорабымен сатқанда, көтерме бағамен өткізгенде 36 теңгеден береміз. Қыста менде 42, 55, 50 теңгеден болды. Бірақ желтоқсанда қымбаттап кетті. Ол кезде 58 теңгеден саттық", - дейді Алматы облысының тұрғыны Күнсұлу Бейісова.

Супермаркеттерде баға айтарлықтай арзандамаған. Мұнда 1-санаттағы жұмыртқаның әр данасы 46- 52 теңгеден сатылып жатыр. Яғни ондығы бұрынғыша 465-525 теңге аралығында.

Еліміздегі жұмыртқа өндірушілер қауымдастығы өкілдерінің айтуынша, баға тұрақсыздығына былтырғы құс тұмауының да кесірі тиген. Соның салдарынан биыл өндірушілер тек 2 миллиардқа жуық өнім алыпты. Ал бұл өткен жылмен салыстырғанда 13 пайызға төмен.

"Жұмыртқа бағасының өзгеріп отыруы жыл сайынғы құбылыс. "Маусымдық өзгеріс" дейміз. Сұранысқа да байланысты. Мәселен, көктем, күз айларында құны өсіп, жазда бағасы төмендейтін кезең. Яғни аптап ыстықта сұраныс азаяды", - дейді Қазақстан жұмыртқа өндірушілер қауымдастығының төрағасы Максим Божко.

Қауымдастықтағылар тауық өсірушілердің мәселесін жан-жақты қарастырып жатыр. Шара қабылданбаса, күзге қарай баға одан сайын шарықтауы мүмкін.

Дереккөз: КТК

Мақаланың түпнұсқасы: https://kaz.nur.kz/society/1920109-mamandar-kuzde-zumyrtqa-bagasy-saryqtauy-mumkin/