Алматыда тозығы жеткен ескі үйлердің орнына не салынатыны белгілі болды

Оңтүстік астанада тозығы жеткен ескі үйлердің орнына 183 пәтерлік үш кешен салынып жатыр деп хабарлайды "ҚазАқпарат".

Қала әкімі Бақытжан Сағынтаев Жетісу ауданында әлеуметтік нысандарды салу барысын тексерді. Бүгінде "Жұмысшылар поселкесі" елдімекенінде Райымбек даңғылы - Крылов - Казаков - Боткин - Гончаров - Скрябин көшелерінің қиылысында реновациялау бағдарламасы бойынша үйлер салынуда.

2020 жылы бұзылған 6 үйдің орнына жалпы алаңы 16 мың шаршы метр болатын 304 пәтерлі 4 үйдің құрылысы басталды.

Биыл тозығы жеткен екі үй сүріліп, жалпы алаңы 12,5 мың шаршы метр болатын 183 пәтерлік үш үйдің құрылысы басталды. Сүрілетін каркас пен қамыстан салынған үш үйдің тұрғындары қала әкіміне қоныс аудару мәселесінің кешігіп жатқанын айтты.

Осы орайда Сағынтаев жаңарту бағдарламасының операторы "Алматы" ӘКК басшылығына тұрғындарға жобаның кезеңдері туралы уақтылы хабарлауды әрі олардың уақытша тұратын қоныстарын жедел шешуді тапсырды.

Еске салсақ, бұған дейін Алматы қаласындағы апатты үйлердің иелеріне сүруші тараптан қандай ұсыныстар жасалып жатқанын жазған едік.

"Тұрғындар осында орналасқан тұрғын үй кешенінде, сол жердегі жаңа үйдің құрылысы аяқталғанға дейін уақытша немесе тұрақты тұра беруіне болады. Сонымен қатар, егер таңдалған пәтерде бөлме саны сәйкесінше болғанымен, пәтер ауданы үлкенірек болса, үй иесіне қосымша ештеңе төлеудің қажеті жоқ", - деген еді "Алматы" ӘКК" АҚ басқарушы директоры Қанат Әлбеков.

Мәтіннен қате тапсаңыз, бізге жазыңыз