Өрт қаупі, аптап ыстық: Бүгін елімізде ауа райы қандай болады

Еліміздің синоптиктері бүгін, 9 шілдеде Қазақстанда ауа райы қандай болатынын болжады деп хабарлайды KAZ.NUR.KZ тілшісі "Қазгидромет" РМК баспасөз қызметіне сілтеме жасап.

Орталығы Павлодар облысының үстіндегі циклон республиканың солтүстігінде, шығысында, оңтүстік-шығысында және орталығында тұрақсыз ауа райына себепші болады. Соның әсерінен жаңбыр жауады, найзағай болады, солтүстікте, солтүстік-шығыста қатты жаңбыр жауады, жекелеген аудандарда бұршақ және дауыл күтіледі.

Еліміздің батысы мен оңтүстігінде жауын-шашынсыз ауа райы сақталады. Республика бойынша кей жерлерде жел күшейеді, оңтүстікте шаңды дауыл соғады.

Қарағанды, Солтүстік Қазақстан, Павлодар облыстарының кей жерлерінде - найзағай, бұршақ, дауыл күтіледі. Жел қарқыны 15-20 м/с дейін күшейеді. Қарағанды облысында жел жылдамдығы 25 м/с жетеді. Түнде Павлодар облысының кей жерлерінде тұман болады.

Ақмола облысының кей жерлерінде найзағай жарқылдайды, жел екпіні - 15-20 м/с. Күндіз бұршақ жауып, дауыл тұрады.

Шығыс Қазақстан облысының кей жерлерінде - найзағай, бұршақ. Секундына 15-20 метр жылдамдықпен жел соғады.

Жамбыл облысында күндіз таулы аудандарда найзағай ойнап, бұршақ жауады. Жел қарқыны - 15-20 м/с. Шаңды дауыл болады.

Күндіз Алматы облысының кей жерлерінде күн күркірейді. Найзағай кезінде жел екпіні 18-23 м/с дейін күшейеді.

Түркістан, Қызылорда, Маңғыстау облыстарының кей жерлерінде күндіз желдің күші 15-20 м/с жетеді, шаңды дауыл тұрады.

Атырау, күндіз Батыс Қазақстан, Қостанай облыстарының кей жерлерінде жел жылдамдығы 15-20 м/с шамасында болады. Күндіз Атырау облысында өте қатты ыстық сақталады.

Маңғыстау облысының басым бөлігінде қатты ыстық, облыстардың оңтүстігінде өте қатты ыстық, Батыс Қазақстан облысының кей жерлерінде аптап ыстық болады.

Қызылорда, Түркістан, Маңғыстау, Атырау, Жамбыл, Ақтөбе облыстарының басым бөлігінде, Қарағанды, Алматы, Батыс Қазақстан облыстарының кей жерлерінде, Қостанай, Шығыс Қазақстан облыстарының оңтүстігінде, Ақмола облысының жекелеген аудандарында төтенше өрт қаупі сақталады.