Қазақстанда жүргізуші куәлігін алу үшін емтихан тапсыру ережесі өзгереді

"Әртүрлі санаттағы көлік құралдарын басқару құқығына жүргізуші куәлігін алу үшін теориялық және практикалық емтихандарды қабылдауды оңтайландыру" пилоттық жобасын іске қосу туралы бұйрық қоғамдық талқылау үшін "Ашық құқықтық нормативтік құқықтық актілер" сайтында жарияланды.

Бұйрықты Ішкі істер министрлігі мен Цифрлық даму, инновациялар және аэроғарыш өнеркәсібі министрлігі дайындады. Құжат 8 қыркүйекте сайтта жарияланды. Бұйрықты қоғамдық талқылау 22-ге дейін созылады.

"2021 жылғы 1 қазаннан бастап 2022 жылғы 30 қыркүйекке дейінгі кезеңде "Әртүрлі санаттағы көлік құралдарын басқару құқығына жүргізуші куәлігін алуға теориялық және практикалық емтихандар қабылдауды оңтайландыру" пилоттық жобасы өткізілсін", – делінген құжатта.

Сондай-ақ емтихан тапсыру және жүргізуші куәлігін беру ережелеріне енгізілген өзгерістер мен толықтырулар кестесі жарияланды, кейбір тармақтар өзгертілді, кейбіреулері алынып тасталды, сонымен қатар жаңалары пайда болды.

Құжатқа сәйкес, теориялық емтиханнан өтпеген жүргізуші куәлігін алғысы келетін адам практикалық емтиханға жіберілмейді. Теориялық және практикалық қайталама емтихан алдыңғы емтихан күнінен бастап бір жұмыс күнінен кешіктірілмей тағайындалады.

Теориялық емтихан "Азаматтарға арналған үкімет" мемлекеттік корпорациясы" КЕАҚ анықтаған тәртіппен, оператордың қатысуымен өткізіледі. Оператор емтихан алушылардың белгіленген талаптарға сәйкестігін бақылауды қамтамасыз етуге міндетті.

Енді теориялық емтиханды тапсыру үшін емтихан алушылар емтихан күніне бір жұмыс күнінен кешіктірмей "электрондық үкімет" порталы арқылы, порталдың интеграциялық қызметтері арқылы немесе Мемлекеттік корпорацияға хабарласу арқылы өтініш бере алады.

Қажетті құжаттар тізімін толтыру тәртібі белгіленген.

Сонымен, емтихан алушы тестілеу күніне бір жұмыс күнінен кешіктірмей теориялық емтиханды тапсыру үшін бос орындардың болуын ескере отырып, теориялық емтихан тапсыратын орынды, күн мен уақытты таңдайды.