RU

Ashyq жүйесінде мәртебесі өзгермесе, кімге жүгіну керек

ашық жобасы11
Көрнекі фото: NUR.KZ/Петр Карандашов

ПТР-тест қорытындысы ауру жоқ екенін көрсетсе де, Ashyq жүйесінде мәртебесі өзгермесе, кімге жүгіну керек? Бұл сұраққа Орталық коммуникациялар қызметінде Қоғамдық денсаулық сақтау ұлттық орталығы басқарма төрағасының орынбасары Айнагүл Қуатбаева жауап берді деп хабарлайды ҚазАқпарат.

"ПТР нәтижесі кейбір зертханаларда түскен сынама санына байланысты 6 сағаттан 1 тәулікке дейін жасалуы мүмкін. Әрине, сол уақыттың ішінде зерттеудің нәтижесі шыққан кезде біріктірілген ақпараттық жүйеге жіберіліп отырады. Осы жүйедегі ақпарат арқылы Ashyq жүйесі байланыстырылғанын білеміз.

Бұл процесс науқастың ЖСН-і дұрыс терілмеуі сияқты қателіктерге байланысты кей жағдайда кешіктірілуі мүмкін. Бірақ зертханаға сынама тапсырылған кезде ЖСН беріледі. Ондай сұрақтар болмауы тиіс. Егер болса, біз жеке бақылауға алып, оның нәтижесін тікелей бере аламыз", - дейді Айнагүл Қуатбаева.

Сондай-ақ, ол Ashyq жүйесіне мәліметтің енгізілуіне Цирфлық даму, инновациялар және аэроғарыш өнеркәсібі министрлігі жауапты екенін атап өтті.

"Дегенмен, біз сол министрлікпен бірге өз мамандарымызды дайындап жатырмыз. Бүгін мен ұйымдастырушылар арқылы өзімнің телефон нөмірімді берейін. Сол арқылы өзіммен тікелей байланысуға болады. Біздің құзырымызда дайындалған 2 маман бар. Осындай сұрақтар болған жағдайда әрбір өңірге, әрбір зертханаға шығып, тікелей көмектесуге мүмкіндігіміз бар.

Мәселе жоқ демейміз. Шынымен ондай жағдайлар болуы мүмкін. Техникалық ақауларға, кейбір жерде интернеттің баяулығына байланысты осындай жағдайлар болуы мүмкін. Яғни, әр сұрақты жеке шешіп, көмектесіп жатырмыз", - деген Айнагүл Қуатбаева бұл мәселе бойынша 1406 call-орталығы арқылы хабарласуға болатынын еске салды.

Сонымен қатар, Санитарлық-эпидемиологиялық бақылау комитеті төрағасының орынбасары Зәуре Ахметова мұндай жағдайда өңірлік санитарлық-эпидемиологиялық бақылау департаменттеріне жүгінуге болатынын айта кетті.

Мақаланың түпнұсқасы: https://kaz.nur.kz/society/1931102-ashyq-zuiesinde-martebesi-ozgermese-kimge-zuginu-kerek/