RU

"Оннан астам оқ атылды": Полиция Лисаковскідегі қайғылы оқиғаның қалай болғанын айтты

Полиция
Фото: Қостанай облысының полиция департаменті

Қостанай облысы полиция департаменті тергеу басқармасы адамға қарсы қылмыстарды тергеу бөлімінің бастығы Артем Ткаченко Лисаковск қаласындағы атысты егжей-тегжейлі айтып берді деп хабарлайды Alau.kz.

Ткаченконың айтуынша, жараланған 33 жастағы әйел полицияға хабарласқан. Ол анасы екеуіне оқ атылғанын айтты.

"Барлығы оннан астам оқ атылған, ал полицейлер сегізден астам оқ атқан. Ер адам "Сайга-410" карабинінен оқ атқан", – деді Ткаченко.

Ер адамның үйінен 50 шақты патрон табылды. Қарудың лицензиясы бар болып шықты.Оқиға орнына келген полиция алдымен кіреберіске кіргені, содан кейін көшеге шыға бастағаны белгілі болды.

Мылтық ұстаған ер адам тәртіп сақшыларының соңынан барып, оқ атқан. Бір кезде күдікті мен тәртіп сақшылары бетпе-бет келіп, бір-біріне оқ жаудырды. Тергеуші жараланып, полицейлер тұрғынның қаруын қолынан тартып алып, залалсыздандырды.

Белгілі болғандай, ер адам мен марқұмның, сондай-ақ оның жараланған қызының арасында ұзақ уақытқа созылған жанжал болған.

Еске сала кетейік, 11 қыркүйекте Лисаковскіде 3-шағын аудандағы үйдің тұрғындары атыс дыбыстарын естіген.

Оқиға орнына полиция келді. Алайда қарулы адамды тоқтата алмады, ол тәртіп сақшыларына қарай оқ атуды жалғастырды. Тергеуші білегінен жарақат алды.

Тәртіп сақшыларына қару қолдануға тура келді, нәтижесінде шабуылдаушы ауруханада қайтыс болды.

Үйдің кіреберісінде жараланған екі әйел табылды, олардың бірі қайтыс болды, екіншісі ауыр халде ауруханада жатыр.

Мақаланың түпнұсқасы: https://kaz.nur.kz/society/1931777-onnan-astam-oq-atyldy-policiya-lisakovskidegi-qaigyly-oqiganyn-qalai-bolganyn-aitty/