Нұр-Сұлтан орталығындағы ғимараттардың бірі отқа оранды (фото, видео)

Нұр-Сұлтан қаласының орталығындағы ғимараттардың бірі отқа оранды деп хабарлайды KAZ.NUR.KZ тілшісі.

Оқиға орнында түсірілген кадрлар әлеуметтік желіде тарады. Елордадағы төтенше жағдайға байланысты қалалық ТЖД баспасөз қызметі пікір білдірді.

"Сағат 18:33-те Нұр-Сұлтан қаласының ТЖД Өрт сөндіру бөлімшелері Тұран даңғылы 37/10 мекенжайында орын алған өрт орнына жеке құрамның 44 адамы мен 11 техникасы құрамында жоғары шақыру нөмірі бойынша шықты.

Алдын ала ақпарат бойынша, ғимараттың шатыры және қаптауы жануда. Шақырту орнына өрт сөндірушілер 5 минуттан кейін дереу жетті. Қазіргі уақытта барлау жұмыстары жүргізілуде",- деді ведомство.

Көп ұзамай департамент қосымша ақпарат жариялады.

"Елордалық өрт сөндірушілердің күшімен өрт сағат 19:10-да ауыздықталды, өрттің алдын ала ауданы 60 шаршы метр. Қаза болғандар мен зардап шеккендер жоқ", - деп қосты Нұр-Сұлтан қалалық ТЖД баспасөз қызметі.