RU

Қазақстанда өлім жазасы Қылмыстық кодекстің 13 бабынан алынып, төртеуінде қалады

Айыпталушы
Көрнекі фото: Максим Золотухин

Қазақстанда өлім жазасын жаза ретінде Қылмыстық кодекстің 13 бабынан алып тастауы мүмкін. Бұл ретте жазаның бұл түрін қолдану шектері соғыс уақытында жасалған әскери сипаттағы аса ауыр қылмыстар үшін ғана белгіленеді. Тиісті заң жобасын мәжіліс депутаттары жалпы отырыста бірінші оқылымда мақұлдады деп хабарлайды KAZ.NUR.KZ.

Мұндай нормалар "Қылмыстық кодекске өлім жазасы бойынша өзгерістер мен толықтырулар енгізу туралы" заң жобасында бекітілген.

Бас прокурордың орынбасары Әсет Шындалиев соттар өлім жазасын немесе оның баламасын қылмыстың ауырлығын, қылмыскердің жеке басын және оның әрекетінің салдарына қатынасын ескере отырып таңдайтынын айтты.

"Өлім жазасын жоюға бағытталған негізгі актілердің бірі – Қазақстан осы жылдың 2 қаңтарында ратификациялаған Екінші факультативтік хаттама. Хаттама өлім жазасын алып тастау үшін барлық қажетті шараны қабылдауға міндеттейді, бірақ ескертпе жасалған жағдайда оны сақтауға мүмкіндік береді. Қазақстан бұл ерекшелікті пайдаланып, ратификациялау кезінде тиісті ескерту жасады", – деді ол.

Палата спикері Нұрлан Нығматулин Шындалиевті қолдады.

"Біз оны ратификацияладық, оған мемлекет басшысы қол қойды. Бұл қазірдің өзінде мемлекеттің міндеті", – деп түсіндірді ол.

Еске салайық, 2003 жылдың желтоқсанында Қазақстанның тұңғыш президенті Нұрсұлтан Назарбаев өлім жазасын толығымен алып тастау туралы мәселе шешілгенге дейін жарамды мерзімсіз мораторий енгізу туралы жарлыққа қол қойған болатын.

Мақаланың түпнұсқасы: https://kaz.nur.kz/society/1936885-qazaqstanda-olim-zazasy-qylmystyq-kodekstin-13-babynan-alynyp-torteuinde-qalady/