Сыр жұрты белгілі ақын Жүрсін Ерманға құрмет көрсетті
Опубликовано:
![Кітаптың тұсаукесер рәсімі Кітаптың тұсаукесер рәсімі](https://cdn.nur.kz/images/1120x630/9b51e3219ecc38a2.jpeg)
Қызылорда қаласында қала күні мерекесі аясында ҚР Еңбек сіңірген қайраткері, ақын Жүрсін Ерманның 5 томдық таңдамалы жыр жинағының тұсаукесер рәсімі және Жастар театры ұсынған "Ұлардың дауысы" атты поэзиялық қойылымының премьерасы өтті.
Кітаптың тұсаукесер рәсімінде Қызылорда қаласының әкімі Ғанибек Қазантаев төл өнер – айтыс атасын мерейтойымен құттықтап, иығына шапан жапты. Ақын өз кезегінде қала күніне орай біршама кітаптарын қалалық орталықтандырылған кітапханалар жүйесіне сыйға тартты. Салтанатты шара "Ұлардың дауысы" атты поэзиялық қойылымның премьерасымен жалғасты.
![Кітаптың тұсаукесер рәсімі Кітаптың тұсаукесер рәсімі](https://cdn.nur.kz/images/1120/9578665711d09db8.jpeg)
Ж.Ермановтың өмірі мен өлеңдеріне құрылған «Ұлардың дауысы» атты поэзиялық қойылым - Қызылорда қаласының Жастар театры, «Парасат» және «Құрмет» ордендерінің иегері, жырау, профессор А.Алматов пен ҚР Мәдениет қайраткері, ақын, режиссер-сценарист О.Нұрмахановтың бірлескен туындысы.
![Кітаптың тұсаукесер рәсімі Кітаптың тұсаукесер рәсімі](https://cdn.nur.kz/images/1120/8151abaafd25f052.jpeg)
Қойылым қиял құшағындағы бала Жүрсін бейнесімен бастау алып, ары қарай жігіт Жүрсіннің азамат болып қалыптасу жолындағы арпалысты сәттерін театр әртістері ақын өлеңдері арқылы жеткізді.
![Кітаптың тұсаукесер рәсімі Кітаптың тұсаукесер рәсімі](https://cdn.nur.kz/images/1120/31454b03d3a08cee.jpeg)
Спектакльдің негізгі бөлімінде сахнада көрініс табатын бәйтерек – өмір ағашы, оның жапырақтары ақынның 70 жасқа дейінгі сәулелі сәттері мен мұңды мезеттерін, жеңісі мен жеңілістерін, Тәңір қосқан қосағы - Бақытжамалмен бірге кешкен ыстық та суық, ащы да тәтті тіршілігін бейнелейді.
![Кітаптың тұсаукесер рәсімі Кітаптың тұсаукесер рәсімі](https://cdn.nur.kz/images/1120/28edd96b9ec55cbc.jpeg)
Қойылым соңында ҚР Еңбек сіңірген қайраткері, ақын Жүрсін Ерман қызылордалықтарды қала күні мерекесімен құттықтап, қала басшылығына және театрдың шығармашылық ұжымына алғысын білдірді.
Мақаланың түпнұсқасы: https://kaz.nur.kz/society/1939166-syr-zurty-belgili-aqyn-zursin-ermanga-qurmet-korsetti/