Қараша айында Қазақстанда ауа райы қандай болады

"Қазгидромет" РМК өкілдері қараша айына арналған ауа райы болжамын ұсынды, деп жазады KAZ.NUR.KZ тілшісі.

Бірінші онкүндіктің басында Қазақстанның солтүстігінде, шығысында және орталығында, 3 қарашадан бастап еліміздің оңтүстік өңірлерінде, онкүндіктің соңында республиканың солтүстік-батыс жартысында атмосфералық фронттардың өтуіне байланысты жаңбыр мен қар түрінде түсетін жауын-шашын, тұман, көктайғақ, желдің күшеюі (солтүстік жартысында бұрқасын болуы ықтимал) күтіледі.

3-4 қарашада батыс аймақтарды қоспағанда, республиканың басым бөлігінде ауа температурасы төмендеп, аязды, нағыз қысқы ауа райы болады:

• Қазақстанның батысында түнде 0,+8°С-тан -5+2°С-қа дейін, күндіз +10+18°С-тан 0,+10°С-қа дейін;
• елдің солтүстік-батыс жартысында, орталығында және шығысында түнде -5+5°С-тан -5-15°С-қа дейін, қиыр шығыста -20°С-қа дейін, күндіз +2+8°С-тан -3-10°С-қа дейін;
• оңтүстікте және оңтүстік-шығыста түнде -3+5°С-тан -1-13°С-қа дейін, күндіз +10+16°С-тан -5+3°С-қа дейін температураның ауытқуы күтіледі.

Бірақ бірінші онкүндіктің ортасынан бастап температура фоны біртіндеп жоғарылайды деп күтілуде.

Екінші онкүндіктің бірінші жартысында Қазақстанның басым бөлігінде солтүстік-батыс циклонның әсерінен тұрақсыз ауа райы күтіледі: екпінді жел соғып, бұрқасын болып, қайтадан жауын-шашын (көбінесе қар түрінде) жаууы ықтимал.

Екінші онкүндіктің соңы мен үшінші онкүндіктің басында және соңында температура төмендеуі мүмкін.

Республиканың солтүстігінде, солтүстік-батысында, шығысында және орталығында ең суық күндері термометр бағанасы түнде -17-25°С-қа дейін, күндіз -8-13°С-қа дейін, ал елдің батысында, оңтүстігінде және оңтүстік-шығысында түнде -5-17°С-қа дейін, күндіз -2-7°С-қа дейін түсуі мүмкін.

Күндізгі уақытта елдің солтүстік жартысында аяздың әлсіреуінен ауа температурасы аздап көтеріледі, оңтүстік жартысында ауа температурасы +3+12°С-қа дейін жоғарылайды.