RU

СҚО-да жаңа босанған әйел коронавирустан қайтыс болды

Өлім-жітім1
Көрнекі фото: Emin Sansar/Anadolu Agency via Getty Images

Солтүстік Қазақстан облысында жаңа босанған әйел коронавирустан қайтыс болды. Дәрігерлер қолдан келгенше тырысқанымен, жас ананың өміріне араша түсе алмады, деп хабарлайды ҚазАқпарат.

СҚО денсаулық сақтау басқармасы баспасөз қызметінің мәліметінше, соңғы 3 күнде өңірде коронавирус жұқтырудың 438 жаңа жағдайы тіркелді. Ауырғандардың ең көбі Петропавлда тіркелді.

Бүгінде жұқпалы аурулар ауруханасында 636 адам ем алса, оның 382-сі тұрақты түрде оттегі аппаратында жатыр. Жансақтау бөлімінде ем қабылдаған 51 науқастың 16-сының жағдайы өте ауыр. Соңғы тәулікте коронавирустан 3 адам қайтыс болды. Ал пандемия басталғалы 317 науқас көз жұмды.

"Қайтыс болған жүкті келіншекті коронавирус жұқтырғандықтан 31 - аптада босандырып алуға тура келді. Ауру асқынып, өкпесі қабынды.

Қазір уәкілетті органдар сараптама жүргізеді. Көпбейінді аурухананың жансақтау бөлімі жағдайында толық көлемде жүргізілген емдеу-диагностикалық шаралар кешеніне қарамастан, босанғаннан кейінгі кезеңде жүкті әйелдің өмірін өкпенің жаппай зақымдануына байланысты құтқару мүмкін болмады. Әйел жүктілігіне байланысты вакцина алмаған", - дейді басқарманың баспасөз хатшысы Гүлнар Қалиева.

Маманның айтуынша, жалпы жыл басынан бері 646 жүкті әйел COVID-19 жұқтырған, оның 203-інде ауру асқынып, пневмонияға ұласқан. 58 жүкті әйелді өкпені жасанды желдету аппаратына қосуға тура келген. Ал 38 әйелді өмірлік көрсеткіштері бойынша кесарь тілігі әдісімен мерзімінен бұрын босандырған. Күні жетпей туғандықтан 3 шақалақ қайтыс болды.

Мақаланың түпнұсқасы: https://kaz.nur.kz/society/1941356-sqo-da-zana-bosangan-aiel-koronavirustan-qaitys-boldy/