Алматыда полицейлер автобус төбесінен отшашу атқан жігіттерді іздеп жатыр (видео)

Алматыда түнде белгісіз бұзақылар автобустардың бірінің төбесінен отшашулар атқан. Оқиға түсірілген видео Қазнетте қызу талқылануда деп хабарлайды KAZ.NUR.KZ.

Видео Instagram желісіндегі dorogi_almaty_official парақшасында жарияланған.

Жазбада қара киім киген екі белгісіз адамның автобустың төбесіне шығып, сол жерден отшашуды атқанын көруге болады.

Автобус қозғала бастағанда екі бұзақы да секіріп түсіп, белгісіз бағытта із-түзсіз жоғалып кеткен.

Біраз уақыттан кейін видеоның астында Алматы қалалық ПД баспасөз қызметінің Instagram-дағы ресми парақшасының атынан жазылған түсініктеме пайда болды.

Ведомствоның хабарлауынша, бұзақыларды анықтау, оларды ұстау және қылмыстық жауапкершілікке тарту жөнінде департаменттің тиісті бөлімшелеріне жолданған.