Депутаттар "жеткілікті шекті" қайта есептеп, кінәлілерді жазалауды талап етті

Зейнетақы жинақтарының ең төменгі жеткіліктік шектерін қайта қарау зейнетақы заңнамасына сәйкес келмейді. Бұл туралы Парламент мәжілісінің депутаты Аманжан Жамалов мәлім етті, деп хабарлайды Қазақпарат.

Оның сөзінше, қазіргі уақытта 600 мың адам жалпы сомасы 2 трлн теңгеге тұрғын үй жағдайын жақсарту мен емделуге өздерінің зейнетақы жинақтарын пайдаланған.

"Биылғы 3 желтоқсанда БЖЗҚ өзінің сайтында 2022 жылға арналған зейнетақы жинақтарының жеткіліктік шегін жариялады. Нәтижесінде, жаңадан жарияланған жоғары мөлшер бойынша өздерінің зейнетақы жинақтарын пайдалану мүмкіндігі бар салымшылар саны 600 мыңнан 150 мың адамға дейін, яғни 4 есе қысқарады", - деді депутат Үкімет басшысы Асқар Маминнің атына жолдаған сауалында.

Осы орайда халық қалаулысы жеткіліктік шегін көтеру қоғамда кеңінен талқыға түскенін атап өтті.

"Бұл мәселенің шешіміне мемлекет басшысының өзі араласуға тура келді. Президент Үкіметке 2022 жылдың 1 сәуіріне дейін бұрынғы жеткіліктік мөлшеріне қатысты мерзімді ұзартуға тапсырды. "Nur Otan" партиясының фракциясы бұл мерзім еңбек министрлігі мен БЖЗҚ қателіктерін жою тұрғысында жүйелі жұмыс жүргізу үшін жұмсалуы керек деп санайды", - деді депутат.

Жамаловтың пайымынша, 2021 жылғы 6 қаңтардағы өзгерістер мен толықтырулар ескерілген зейнетақы жинақтарының төменгі жеткіліктік шегін айқындау әдіснамасы "Зейнетақымен қамсыздандыру туралы" Заңы нормаларына сай келмейді.

Депутат осы орайда әдіснамада методологиялық қателік жіберілгенін, яғни онда шекті мән ең төменгі зейнетақы көрсеткішінің орнына ең төменгі жалақы мөлшерімен байланыстырылғанын жеткізді.

Бұл өз кезегінде ең төменгі жеткілікті шектің орташа есеппен 64 пайыздан 83 пайызға дейін артуына алып келді.

Оның сөзінше, заңнамаға сәйкес есептеулерде ең төменгі зейнетақы көрсеткішін пайдаланған кезде, жеткіліктілік шектің деңгейі 2021 жылмен салыстырғанда тек 9 пайызға өсер еді.