Алаяқтардың құрбаны болған ақтөбеліктер онлайн-несие беруді тоқтатуды сұрайды

Опубликовано:

Кадр
Видеодан кадр: Астана телеарнасы

Ақтөбелік бір топ тұрғын үкіметтен онлайн-несие беруді тоқтатуды сұрайды. Себебі, олардың  атынан  белгісіз біреулер несие рәсімдеп, тақырға отырғызған. Алаяқтың арбауына түсіп, банкке  қыруар қарыз боп қалғандар не істерін білмей қиналуда.Тығырыққа тірелгендердің біреуі  жалғыз баспанасын сатып жіберсе, кейбіреулері ай сайын  алмаған несиені төлеуге мәжбүр болып отыр, деп хабарлайды Астана телеарнасы.

Алаяқтардың құрбаны болған Болат Дәулекенов өзі секілді алданғандарды Whatsapp месенжеріндегі топқа жинаған.

Оның сөзінше, бұл топта қазір отызға жуық адам бар.

Алаяқтардың онлайн-несиені рәсімдеу әрекеті бірдей, дейді қала тұрғыны. Сан соғып қалғандардың барлығына кешке, адам жұмыстан шаршаған кезде телефон соққан. Өздерін банктің менеджерімін деп таныстырып, "біреу сіздің атыңызға онлайн-несие рәсімдеп жатыр, біз бұны тоқтатамыз" деп алдаған.   

"Онлайн-несиені блоктау үшін, өтініш қалдырыңыз деді де, мені банктің қауіпсіздік қызметімен байланыстырды. Ол кісі онлайн-несиеге өтініш беріңіз деді. Қайта қаржыландырамыз және тағы 980 мың теңге несие мақұлдаймыз деді.  Мақұлдаған соң, шоттағы ақшаны Халық банктегі арнайы дайындалған депозит ұяшықтарына аударыңыз деп айтты. Қарсыласып едім, келесіде банктен несие ала алмайтын боласыз деп қорқытты. Амал жоқтан, келістім", - дейді Болат Дәулекенов.

Сөйтіп, айналдырған 2-3 сағатта алаяқтар бұл кісінің атына 3 миллион 730 мың теңге несие рәсімдеген. Тағы бір тұрғын Гүлшат Айтқазиева да алаяқтардың құрбанына айналғанын жасырған жоқ.

Ешкімді естімей, тыңдамай, тек телефонның ар жағындағы адамның бұйрығын орындай отырып,  9 миллион теңгеге жуық онлайн-несие алғанымды үш күннен соң ғана түсіндім, дейді ол.  

"8 миллион 800 мың теңге менде, бәрін біреуге аударыппын, плюс 2-қараша күні түскен жалақым да жоқ. Бір апта бұрын пәтерімді саттым, күйеуімді әрең көндірдім. Банктегі кредиттерді жаптым. Жұрттан қайыр сұрап кеттім", - дейді Ақтөбе қаласының тұрғыны Гүлшат Айтқазиева.

Ақтөбе облыстық  полиция  департаментінде қазір онлайн-алаяқтарға алданған 74 адамның арызы қаралып жатыр.  13 іс сотқа жіберілген.

"Тағы 13 іс елдің басқа облыстарына біріктіру үшін жолданды, себебі басқа облыстарда айыпкерлер ұсталып, қамалып, сонда жауапкершілікке тартылып жатқандықтан, басқа облыстарға жіберілді", - дейді облыстық полиция департаментінің тергеу басқармасы басшысының орынбасары Нұрболат Сұлтанов.

Банк өкілдерінің айтуынша, алданған тұрғындардың ісі жеке қаралады. Алаяқтың арбауына түскен клиент міндетті түрде банк бөлімшесіне барып, өтініш жазуы керек.

"Кез-келген банктің клиенті болса да, жеке бас ақпаратты ешкімге айтуға болмайды. Банктен ешқашан қоңырау шалып, банктің қызметкері клиенттің жеке ақпаратын ешқашан сұрамайды, егер сұраса бұл нақты алаяқтармен сөйлесіп тұрғанын түсінсін",- дейді банк баспасөз қызметінің өкілі Досбол Арыстанбек.

Полиция алаяқтарды анықтағанша, зардап шеккендер саны көбейеді деп алаңдаған тұрғындар елімізде онлайн-несиені тоқтатуды талап етіп отыр.

"Банкте отырған құзырлы органдардан, министрлерден сұраймын. Онлайн-кредитті тоқтатсын. Бұл тек Қазақстанның қарапайым халқын қанау", - дейді Ақтөбе қаласының тұрғыны Сара Қожанова.

Автор: Гүлвира Сейтенова

Мақаланың түпнұсқасы: https://kaz.nur.kz/society/1947858-alayaqtardyn-qurbany-bolgan-aqtobelikter-onlain-nesie-berudi-toqtatudy-suraidy/