Алаяқтар елді алдау үшін қандай бағдарламалар қолданады

Опубликовано:

Ұялы байланыс
Көрнекі сурет: pixabay.com

Нұр-Сұлтан полиция департаменті алаяқтар адамдарды алдау үшін қандай бағдарламаларды қолданатынын айтып берді. Елордалық полицейлер олардың тұзағына түсіп қалмас үшін "AnyDesk" және "TeamViewer" қосымшаларын жүктеуден сақ болуды ескертеді. Ведомство бұл жайлы ақпаратты ресми сайтында жариялады.

Полиция желіде алаяқтықтың жиілеп кеткенін атап өтті.

Құзырлы органның мәліметінше, алаяқтар өздерінің схемаларында үшінші тарап құрылғысына қашықтан қол жеткізуге арналған танымал және заңды бағдарламаларды пайдаланады.

Мобильді банкинг дағдыларын толық меңгермеген азаматтарға олар "AnyDesk" және "TeamViewer" қосымшаларын жүктеуді ұсынады екен. Осылайша, олар мобильді құрылғыларға немесе компьютерлерге толық қол жеткізетін көрінеді, ал бұл өз кезегінде азаматтардан ақша жымқыруды жеңілдетеді дейді полицейлер.

Сондай-ақ, полиция бүгінгі таңда ең көп таралған схемалардың бірі банк қызметкерлерінің атынан қоңырау шалу екенін айта кетті.

Ведомство бұл ретте алаяқтар көбіне колл-орталықтың ресми нөмірін қайталай отырып, банк карталарын пайдаланып, қандай да бір күмәнді операцияларды жүргізу сылтауымен адамды жаңылыстыруға тырысатынын атап өтті.

"Олар банк саласындағы білімдерін пайдалана отырып, пайдакүнемдік ниетінен өз құрбандарын асқан шеберлікпен шатастырады, бұл көбінесе жеке мәліметтерді иеленуге ықпал етеді. Ал аңғал азаматтар алаяқтарға банк карталарының, CVV-кодының деректемелерін және келіп түскен СМС-парольдерді береді. Нәтижесінде ақшалай қаражатты шоттардан оңай аударуға әкеп соғады.

Банк картасын ұстаушылар алаяқтардың құрбанына айналмас үшін, деректемелер мен СМС-парольдер туралы мәліметтер сұрап банк қызметкерлері атынан келіп түетін кез келген қоңырауды дереу тоқтату қажет.

Есіңізде болсын, банк қызметкерлері ешқашан мұндай мәліметтер сұрамайды және қоңырау соқпайды. Осындай жағдайларда сақ болуларыңызды және барлық фактілер туралы полицияға хабарлауыңызды сұраймыз", - дейді Нұр-Сұлтан қаласы криминалдық полиция басқармасы бөлімінің бастығы Талғат Бөлегенов.

Мақаланың түпнұсқасы: https://kaz.nur.kz/society/1955921-alayaqtar-eldi-aldau-usin-qandai-bagdarlamalar-qoldanady/