Қасым-Жомарт Кемелұлы: Дәл осындай қарақшылардың қатыгез әрекетін көрген жоқпыз
Жарияланған күні:
![Алматы Алматы](https://cdn.nur.kz/images/1120x630/222eddaa26286717.jpeg)
Мемлекет басшысы Қасым-Жомарт Тоқаев "Qazaqstan" ұлттық телеарнасының эфирінде болған сұхбатында қаңтардағы оқиғаны қалай атауға болатыны жөнінде пікір білдірді, деп хабарлайды KAZ.NUR.KZ тілшісі.
Тележурналист Жайна Сламбек ел президентіне қаңтардағы оқиғаларды қалай атауға болатыны туралы сұрақ қойды.
"Бұл оқиғаны ел ішінде әртүрлі атап жүргенін білемін. Қалай болғанда да біз қаралы, қасіретті күндерді бастан өткердік. Оны мойындауымыз керек. Тәуелсіздіктің 30 жылы ішінде көптеген сынаққа тап болдық, оның бәрін ел болып еңсердік. Бірақ, дәл осындай қарақшылардың қатыгез әрекетін көрген жоқпыз. Еліне, жеріне адал қызмет ететін, нағыз отаншыл азаматтар мұндай опасыздыққа бармайды. Бұл – анық нәрсе", - деді Тоқаев.
Президенттің сөзінше, жағдайды өздерінің жеке мүддесіне пайдаланғысы келген адамдар төңкеріс жасауға талпынған.
"Француз тілінде осындай әрекетті coup d’etat деп айтады. Бұл – төңкеріс деген сөз. Елдігімізге, мемлекеттік тұтастығымызға, халқымыздың қауіпсіздігіне қарсы жасалған әрекет болды. Әрине, халыққа әлі де көп нәрсе түсініксіз. Қарапайым азаматтар өздерінің сүйікті қаласын өз қолымен қиратпайтыны белгілі. Қарақшылар, лаңкестер Алматыға сырттан келді. Мақсат белгілі: кісі өлтіру, қорқыту, дүкендерді тонау, әйелдерді зорлау, ақыр соңында билікті құлату", - деді мемлекет басшысы Қасым-Жомарт Тоқаев.
Сондай-ақ президент сұхбатында олардың билікке неліктен қарсы шыққаны туралы сұраққа жауап берді.
"Мәселе мынада: төңкерісшілер елімізде қолға алынған реформаларға кедергі келтіруге тырысты. Тіпті Президентке де қарсы болды. Өзгерістер олардың мүдделеріне тиімді емес еді. Өйткені, реформалардың басты мақсаты – әділетті қоғам орнату, монополияларды жою, саяси трансформация жасау, еліміздің экономикалық дамуын жеделдету. Халық та осыны талап етіп отыр. Сондықтан, бағытымызды өзгертпейміз, реформалар міндетті түрде өз жалғасын табады", - деді мемлекет басшысы.
Мақаланың түпнұсқасы: https://kaz.nur.kz/politics/1956653-toqaev-dal-osyndai-qaraqsylardyn-qatigez-areketin-korgen-zoqpyz/