Шымкенттіктер Наурыз мерекесіне орай 30 метрлік қазы айналдырды

Наурыз мейрамына орай Шымкент тұрғындары елде бұрын-соңды болмаған ең ұзын қазыны айналдырды. Оның ұзындығы - 30 метр, деп жазады KAZ.NUR.KZ тілшісі OTYRAR телеарнасына сілтеме жасап.

Ұлттық тағамды ондаған аспаз әзірлеген, ал дайын өнім қаладағы әлеуметтік мекемелерге таратылды.

Қазы арнайы рецепт бойынша дайындалды. Алайда аспаздар ұлттық тағамды дайындау әдісін құпия ұстауды жөн көрген.

Қазақ дастарханын қазысыз елестету мүмкін емес. Қазы-қарта, жал-жая - қазақтың дәстүрлі ұлттық тағамы, жылқы етінің ең таңдаулы әрі сыйлы мүшелері.

Сонымен қатар, қазы жылқы малының семiз, арықтығына қарай түрлiше аталады. Оны елi, бармақ, шынашақпен өлшейдi. Қазының кере қазы, тең қазы, сере қазы, табан қазы, би қазы, дөңбек қазы, шынтақ қазы сияқты атаулары бар.