БҚО-дағы су тасқыны: Бірнеше тасжол жабылды

Батыс Қазақстан облысында су шайып кеткен бірнеше автокөлік жолы жабылды, деп хабарлайды Қазақпарат.

Батыс Қазақстан облыстық төтенше жағдайлар департаментінің жедел штабы ұсынған ақпаратқа сәйкес, Шыңғырлау ауданында аудандық маңызы бар Шыңғырлау-Шоқтыбай тасжолының 8-шақырымын еріген қар суы шайып кеткен.

Шыңғырлау-Талдысай тасжолының 3-шақырымында да осындай жағдай тіркелді. Бқған дейін 2 сәуір күні 16.30-да облыстық маңызы бар Бөрлі-Ақсай-Жымпиты тасжолын (87-шақырымында) су басты.

Теректі ауданында жергілікті маңызы бар Сарыөмір-Дуана тасжолын да су шайды. Соның салдарынан аталмыш жолдар барлық көлік түрлері үшін жабылған.

Сонымен қатар 2 сәуір күні 17.00-де Теректі ауданы Долинный ауылы тұсында республикалық маңызы бар Подстепный-Федоров-РФ шекарасы жолынан су асып кеткені белгілі болды. Ағын суды тоқтату үшін тиісті жұмыстар жасалды. Жол қатынасында іркіліс болған жоқ. Сағат 23.25-те тасқын су тыйылды.

Жәнібек ауданында сағат 19.00-де жергілікті маңызы бар Жәнібек-Талов жолының бірнеше жерін тасқын су басты. Бұл жолмен жүк талғамайтын көліктер жүре алады. Облыста күннің күрт жылынып, қардың еруіне, сондай-ақ өзендерде су деңгейінің көтерілуіне байланысты күрделі жағдай қалыпттасып отыр.

Қазіргі уақытта бес ауданда көктемгі су тасқынына қарсы жұмыстарға 267 адам (51 техника, 6 жүзу құралы, 13 мотопомпа) жұмылдырылды.