Балаңыздың атынан біреу үйірмеге барып жүрген жоқ па: Тексеру қызметі қосылды

"Әділдік жолы" қоғамдық бірлестігінің атқарушы директоры Дидар Смағұлов секциялар мен үйірмелерге берілген ваучерді қалай тексеруге болатынын айтып берді, деп жазады Sputnik Қазақстан.

"Достар, тегін үйірмелер туралы бірінші жақсы жаңалық: баланың тіркелуі жөніндегі мәліметті арнайы "artsport.kz/kz/checkticket" сервистен білуге болады. Жеке сәйкестендіру нөмірі мен аты-жөнін теру қажет. Егер балаңыз ешқайда бармаса, алайда ваучер бар деп көрсетілсе – біреу ақша ұрлап жатыр деген сөз", - деді Дидар Смағұлов.

Қоғамдық бірлекстіктің директоры заңды бұзу фактілері анықталса, өзіне 8 702 67 66 555 WhatsApp-қа ақпарат жіберуге болатынын да жеткізді.

Айта кетейік, 2021 жылы Қазақстанда мемлекет тарапынан шығармашылық және спорттық тапсырыс жүйесі енгізілді.

Оған сәйкес, 4-17 жастағы балалар үйірмелер мен секцияларға тегін қатыса алады. Бос орындар кезекпен беріледі. Ал тегін үйірмеге баратын балаға ваучер рәсімделеді. Осы жүйе бойынша 4 миллион бала тегін үйірмелер мен секцияларға қатыса алады.