Субұрқақтарда неліктен шомылуға болмайды: Елорданың бас санитариялық дәрігері жауап берді

Астананың бас санитариялық дәрігері Сархат Бейсенова қаладағы субұрқақтарда неліктен шомылуға болмайтындығын түсіндірді, деп хабарлайды ҚазАқпарат.

"Жазғы маусымда субұрқақтар қала тұрғындарының назарын аударатын орынға айналады. Ал кейбір тұрғындар субұрқақтың жанында серуендеп қана қоймай, оған шомылғысы келеді. Алайда олар осылайша денсаулығына қауіп төндіреді.

Субұрқақтағы су жиі жаңартылмайтынын ескерген жөн. Осыған байланысты вирустық және паразиттік ауруларды жұқтыру қаупі жоғары. Сондай-ақ субұрқақта қаңғыбас иттер мен құстар шомылады. Олар әртүрлі инфекциялардың қоздырғышы болуы мүмкін. Оның үстіне, жоғары ауа температурасында судағы микроорганизмдер тез көбейеді.

Сондықтан субұрқақта шомылу суық тию қаупімен ғана емес, өткір ішек инфекциясына немесе конъюнктивитке де айналуы мүмкін. Сонымен қатар, энтеровирустық және ротавирустық инфекциялар, сондай-ақ А вирустық гепатиті үлкен қауіп төндіреді", - деді Бейсенова.

Оның сөзінше, субұрқақта жүзу кезінде жарақат алу қаупі де жоғары. Айтуынша, қосылған коммуникациялардың кесірінен механикалық және электр жарақатын алуыңыз ықтимал.

"Осыған байланысты, астаналық СЭБД ата-аналарды балаларына қауіпсіздік және жеке бас гигиенасын сақтау ережелерін түсіндіруге шақырады. Ешбір жағдайда балаларды қараусыз қалдырмаңыз және оларға күн сайын шомылуға тыйым салынған жерлерде шомылу өте қауіпті екенін ескертіңіз", - деді Сархат Бейсенова.

Мақаланың түпнұсқасы: https://kaz.nur.kz/society/1972544-suburqaqtarda-nelikten-somyluga-bolmaidy-elordanyn-bas-sanitariyalyq-darigeri-zauap-berdi/