Атырау перзентханасында жаңа туған нәресте еденге құлады: Арнайы комиссия жұмыс істеуде

Опубликовано:

сәби
Көрнекі фото: pixabay.com

Атырау облыстық перинаталдық орталығында әйел сәбиді қолынан түсіріп алды. Дәрігерлер баланың жағдайы айтарлықтай жаман емес екенін айтып отыр, деп хабарлайды "Ақ Жайық" басылымы.

Қала тұрғыны Әнуар Жұмабайдың айтуынша, әйелінің сіңлісі босанған соң 2 күннен кейін босанған әйелдермен бірге рентгенге түсуге шақырылған. Палатада төрт әйел болған. Алдымен екі ананы, сосын тағы біреуін шақырған. Нәтижесінде босанғаннан кейін өз-өзіне келіп үлгермеген, өзі әрең қозғалатын бір әйел балаларға қарап қалады.

Әйелінің кішкентай жиені қатты жылап, әлгі келіншек оны қолына алып, жұбатуға тырысады. Жұбата алмаған соң медбикелер мен дәрігерлерді шақыруға барады. Ешкім келмейді. Бір кезде әйелдің жағдайы нашарлап, баланы еденге түсіріп алады. Содан кейін де әйел мен балаға көмекке медбикелер емес, санитар келеді.

Басылым мәліметінше, бұл бақылау камерасындағы кадрдан көрінген.

"Біз полициямен келгенше екі сағат бойы балаға көмек көрсетілмеді, жансақтау бөліміне жатқызылмады, баланы тексермеді. Қызметкерлер ештеңе болмағандай кейіп танытты, бәрі "не болды?" деп кері сұрақ қойды.

Бастапқыда баланың жағдайы жақсы деп айтты. Орталық қызметкері анасына баламен бірге КТ-ға баруға болмайды деп, тыйым салды. Біз наразылық білдіргенде, тағы бір қызметкер анасы жаңа туған нәрестемен бірге жүруі керек екенін растады. Бүгін бізге нәрестеге қан құю керек екенін, егер ол кеше реанимацияға түспегенде, одан айырылып қалуымыз мүмкін екенін айтты.

Орталық басшылығы зардап шеккен баланың анасымен тілдеспейді. Бүкіл осы жағдай, қарама-қайшы ақпарат, үнсіздік босанған әйелді және бүкіл отбасын қатты алаңдатып отыр. Ал анасына қазір баласының жағдайы қалай екенін, қандай шаралар алынып жатқанын шынайы айту үшін қолдау керек", – дейді ол.

Бұл жайтқа қатысты облыстық денсаулық сақтау басқармасының басшысы Асхан Байдувалиев пікір білдірді.

"Ең бастысы, бала аман. Тексеру және КТ одан елеулі зақым таппады. Бірақ қазір бұл істі тексеру үшін жұмыс комиссиясы құрылды", - деді ол.

Өңірлік ДСБ басшысы алдағы уақытта толық ақпарат берілетінін атап өтті.

Мақаланың түпнұсқасы: https://kaz.nur.kz/society/1973719-atyrau-perzentxanasynda-bosangan-aiel-naresteni-edenge-qulatyp-aldy/

jitsu gif