Қазақстанға 13 мың литрден астам сыраны заңсыз әкелмек болған

Қазақстанға 13 мың литрден астам ресейлік сыраны заңсыз әкелмек болған, деп хабарлайды KAZ.NUR.KZ тілшісі Алматы қаласы бойынша Мемлекеттік кірістер департаментіне сілтеме жасап.

"2022 жылғы 9 тамызда тексеріс барысында Ресей Федерациясынан жалпы көлемі 13 484,5 литр алкоголь өнімін (сыра) заңсыз әкелу және сақтау фактісі анықталды, оның 10 830 литрі пластикалық ыдыстарға құйылған.

Қазақстан Республикасының қолданыстағы заңнамасына сәйкес, пластик ыдыстардағы және рұқсат құжатсыз алкоголь өнімінің айналымына тыйым салынады", – деп түсіндірді Мемлекеттік кірістер департаментінен.

Бұдан бөлек департамент мамандары тексеріс жүргізген нысанда контрафактілік алкоголь өнімдерін өндіретін жасырын цех анықталған. Атап айтқанда, онда алкогольді, соның ішінде виски мен бурбонды жасау үшін қолданылатын самогон аппараты мен құрамында спирті бар сұйықтықтар табылған.

Мемлекеттік кірістер департаменті алкоголь өнімдерінің көлеңкелі айналымы мемлекетке ғана залал келтіріп қоймай, халықтың денсаулығына айтарлықтай зиян тигізетінін атап өтті.

Сондай-ақ ведомство арақтың ең төменгі бөлшек сауда бағасы бүгінде литріне 1 980 теңге, коньяк пен брендиге литріне 2 930 теңге мөлшерінде белгіленгенін еске салды.

"Сауда объектілері алкоголь өнімін ең төменгі бөлшек сауда бағасынан арзан сатқан жағдайда, Алматы қаласы, Абылай хан даңғылы, 93/95 мекенжайы бойынша қалалық Мемлекеттік кірістер департаментіне немесе 1414 нөмірі бойынша байланыс орталығына хабарласуды сұраймыз", – дейді Мемлекеттік кірістер департаментінен.