Сыр елінде жаңа жылу-электр орталығының капсуласы салынды

Опубликовано:

жаңа жылу-электр орталығының капсуласы
Фото: Қызылорда облысының әкімдігі

Республиканың тек екі аймағында ТМД елдерінде теңдесі жоқ заманауи жаңа жылу-электр орталығы салынбақ. Алғашқысы Сыр елінде бастау алды.

Бүгінге дейін Қызылорда қаласындағы электр жылу орталығы 50-60 жылдан бері үздіксіз жұмыс жасайды. Сондықтан электр желілерінің де әбден тозығы жеткен. Бұл сөзсіз электр жүктемесіне салмақ салады. Өзекті мәселелерді өз уақытында назарға алған аймақ басшысы Энергетика министрлігімен тиісті жұмыстарды атқарып, бірлескен түрде оңтайлы шешім қабылдады. Таяуда ғана қос тарап бірлескен меморандумға қол қойған еді.

Қызылорда облысы
Фото: Қызылорда облысының әкімдігі

Ал бүгін игілікті қадамның жалғасы ретінде облыс әкімі Нұрлыбек Нәлібаев пен "Акса Энерджи" компаниясының атқарушы комитетінің төрағасының орынбасары Коркут Озтуркмен Сыр елінде бұрын-соңды болмаған заманауи үлгідегі электр орталығының құрылысы басталатын жерге капсула салу рәсіміне қатысты.

Аймақ басшысы президенттің тапсырмасына сәйкес мұндай ірі жобаның тек өңір үшін ғана емес республикаға маңызы бар екенін тілге тиек етті.

Қызылорда облысы
Фото: Қызылорда облысының әкімдігі

"Мемлекет басшысы оңтүстік өңірлерді үздіксіз электр энергиясымен қамтамасыз ету мақсатында 3 жыл ішінде қуаттылығы 1000 мегаваттан астам электр станцияларын салуды тапсырды.

Осы тапсырма аясында заманауи қондырғылар республиканың екі аймағында ғана салынады. Алғаш болып, біздің аймақта жүзеге асуда. Құны 215 млрд.теңгеден асатын жоба 36 ай ішінде аяқталады. Осылайша электр станцияны 2025 жылы ел игілігіне табыстайтын боламыз.

Аймақ игілігіне арнап салынатын жаңа нысанның іске асуына ұйытқы болған Энергетика министрлігіне және мүдделік танытқан компания басшысы Коркут Өзтүркмен мырзаға барша Сыр жұртшылығының атынан шынайы алғысымызды жеткіземіз",-деді аймақ басшысы Н.Нәлібаев.

Қызылорда облысы
Фото: Қызылорда облысының әкімдігі

Қуаттылығы 240 мегаватқа жететін жаңа нысан энергия жетіспеушілігін едәуір төмендетеді. Бұл Тәуелсіздік алған жылдары елімізде бюджеттен тыс қаржы көздерінен, яғни шетелдік инвесторлардың қаржысына іске асырылатын ең ауқымды теңдессіз жоба.

Түрік компаниясының өкілі мұндай ауқымды жобаны іске асыру энергетикалық қауіпсіздікті және тарифті сақтауға мүмкіндік беретінін жеткізді.

"Қазақстан болашағы өте зор ел. Біз осы кезге дейін әлемнің бірнеше мемлекеттеріне энергетикалық бағытта ірі жобаларды іске асырдық. Енді Қазақстанда, оның ішінде Қызылорда өңірінде нысанды салуға ниеттіміз.

Қызылордамен жасалған 15 жылдық келісім-шарт негізінде біз қаланың энергия мен жылу қажеттілігін қамтамасыз ететін боламыз. Бұл орталық энергетикалық қауіпсіздікті күшейтуге ерекше мүмкіндік береді",-деді Коркут Озтуркмен.

Мақаланың түпнұсқасы: https://kaz.nur.kz/society/1986692-syr-elinde-zana-zylu-elektr-ortalygynyn-kapsulasy-salyndy/