"5 сағат күресті": СҚО дәрігерлері ішек-қарны ақтарылған 3 жасар қызды аман алып қалды

Солтүстік Қазақстан облысында дәрігерлер 3 жасар қыздың өмірі үшін 5 сағатқа жуық күресті. Абайсызда шалғыға түскен бүлдіршіннің ішек-қарны ақтарылып қалған, деп хабарлайды ҚазАқпарат.

Басылым мәліметінше, оқыс оқиға 5 қыркүйек күні сағат 22.00 шамасында болған.

Өңірдің көпсалалы балалар ауруханасы бас дәрігерінің міндетін атқарушы Нұрлан Айманов 3 жасар қыздың ағасы шөп шабатын триммермен ойнағанын жеткізді.

Оны жүргізіп, бұта арасындағы қызды байқамай қалған екен. Салдарынан қарындасының қарын тұсы осылып түскен.

Медицина маманының сөзінше, тілік оң жақ қабырға бойынан басталып, сол жақ арқасына дейін болған. Баланың ішектеріне, асқазанына, бауырына зақым келді.

"Асқазаны мүлде екіге бөлінген, бауырының бір бөлігін тіліп түскен, ол қарнында бөлек жатты. Бүкіл ішектері бірнеше жерден кесілген болды. Қызды аман алып қала алдық, бұған біз қатты қуандық. Бұл ең алдымен ауылдық дәрігерлік амбулаторияның, Явленка аудандық ауруханасының білікті мамандарының арқасы. Олар тез арада дұрыс шара қолданып, жағдайды тұрақтандырып, қажетті дәрі-дәрмек беріп, ауырсынуды басты. Аудандық аурухананың реаниматологы жағдайды бақылауда ұстап, қажетті анестезиялық-реанимациялық жұмысты жоғары деңгейде жүргізді. Қыздың қысымы 0-де болған. Ол маңызды мүшелердің жұмысын қалыпқа келтіріп, санитарлық авиацияға тапсырды", - дейді Нұрлан Айманов.

Сағат 00.00 кезінде санавиациямен облыстық балалар ауруханасынан барған дәрігерлер операция жасауға әзір болды.

Үш адамнан тұратын бригада 5 сағатқа жуық ота жасап, қыздың асқазанын тігіп, қалыпқа келтірді.

Нұрлан Айманов әдетте асқазанды қалыпқа келтіру қолдан келмейтінін жоққа шығармады.

Оның сөзінше, бұндай ота өте сирек жасалады.

"Дәрігерлер сондай-ақ барлық ішектерін тігіп, қанды тоқтатты. Екінші күні тағы да сол бригаданы жіберіп, қызды облыстық балалар ауруханасына жеткіздік. Жағдайы ауыр, ол түсінікті де, бірақ қалыпты. Ана мен бала денсаулығы ұлттық ғылыми орталығымен байланысып, бірнеше рет кеңес алдық. Алған жарақатының ауырлығына қарай баланы сол орталыққа жіберетін болдық. Бүгін республикалық санавиация келіп алып кетеді", - дейді Нұрлан Айманов.

Ота жасағандардың бірі балалар хирургиясы бөлімше меңгерушісінің міндетін атқарушы Олег Новицкий.

Ол жергілікті аудандық дәрігерлер бәрін дұрыс жасағанын атап өтті.

"Біз келгесін-ақ бірден ота жасауға кірістік. Бұл - сирек кездесетін жағдай, ауыр жарақат. Әрі түн болғандықтан ота жасау қиын болды. Асықпай бәрін дұрыстап тіктік. Бәріміз бірлесе қимылдап, баланың жағдайын тұрақтандыра алдық. Менің тәжірбиемде бұрын мұндай ауыр жарақат болған емес", - дейді Олег Новицкий.

Қазіргі уақытта бүлдіршін жансақтау бөлімінде жатыр.

"Ата-аналардан балаларын жалғыз қалдырмауын жалынып сұраймын. Дәрігерлерге алғысым шексіз, қолдан келгенін жасады. Қолдары алтын. Біз оларға өмір бойы қарыздар болып өтеміз. Қызым бұл қиындықты жеңіп шығып, арамызға қосылатынына сенімдімін", - дейді қыздың анасы Виктория.